മാഞ്ചസ്റ്റര്‍ ടെസ്റ്റ് ആവേശകരമായ അന്ത്യത്തിലേക്ക്. വിന്‍ഡീസിന് 312 റണ്‍സ് വിജയ ലക്ഷ്യം നല്‍കിയ ഇംഗ്ലണ്ട് ഇതുവരെ മൂന്ന് വിക്കറ്റാണ് നേടിയട്ടുള്ളത്. 74 ഓവറുകള്‍ അവശേഷിക്കെ ഏഴ് വിക്കറ്റുകള്‍ കൂടി നേടിയാല്‍ ടീമിന് വിജയം ഉറപ്പിക്കാനാകും. അതെ സമയം 74 ഓവറുകള്‍ അതിജീവിക്കുക എന്ന ശ്രമകരമായ ദൗത്യമാണ് വിന്‍ഡീസിന് മുന്നിലുള്ളത്.
സ്റ്റുവര്‍ട് ബ്രോഡ് രണ്ടും ക്രിസ് വോക്സ് ഒരു വിക്കറ്റും നേടിയാണ് ഇംഗ്ലണ്ടിന് മേല്‍ക്കൈ നല്‍കിയിരിക്കുന്നത്. ക്രെയിഗ് ബ്രാത്‍വൈറ്റ്(12), ജോണ്‍ കാംപെല്‍(4), ഷായി ഹോപ്(7) എന്നിവരുടെ വിക്കറ്റുകളാണ് സന്ദര്‍ശകര്‍ക്ക് നഷ്ടമായത്. ഷമാര്‍ ബ്രൂക്ക്സ്, റോസ്ടണ്‍ ചേസ് എന്നിവരാണ് ക്രീസിലുള്ളത്.
25/3 എന്ന നിലയിലുള്ള വിന്‍ഡീസിന് വിജയത്തിനായി 287 റണ്‍സാണ് നേടേണ്ടത്. മത്സരം സമനിലയിലാക്കി പരമ്പരയിലെ ലീഡ് നിലനിര്‍ത്താനാകുമോ എന്നതാകും വിന്‍ഡീസിന്റെ ലക്ഷ്യം.
