ഐപിഎൽ 2026-ന് മുന്നോടിയായി ചെന്നൈ സൂപ്പർ കിംഗ്സ് (CSK) ഇതിഹാസം എം.എസ്. ധോണി റാഞ്ചിയിലെ ജെഎസ്സിഎ (JSCA) സ്റ്റേഡിയത്തിൽ പരിശീലനം ആരംഭിച്ചു. ധോണി പാഡ് കെട്ടി ബാറ്റിംഗിന് തയ്യാറെടുക്കുന്നതും ജെഎസ്സിഎ സെക്രട്ടറി സൗരഭ് തിവാരിയുമായി സംസാരിക്കുന്നതുമായ വീഡിയോ പുറത്തുവന്നതോടെ ആരാധകർ വലിയ ആവേശത്തിലാണ്. 2020-ൽ അന്താരാഷ്ട്ര ക്രിക്കറ്റിൽ നിന്ന് വിരമിച്ച 44-കാരനായ ധോണി, സിഎസ്കെയ്ക്കായി മറ്റൊരു സീസണിൽ കൂടി കളിക്കാനിറങ്ങുമെന്ന് ഉറപ്പായിരുന്നു.
കഴിഞ്ഞ 2025 സീസണിൽ 14 മത്സരങ്ങളിൽ നിന്ന് വെറും നാല് ജയം മാത്രം നേടി പോയിന്റ് പട്ടികയിൽ അവസാന സ്ഥാനത്തായിരുന്നു സിഎസ്കെ. ആ സീസണിൽ 135.17 സ്ട്രൈക്ക് റേറ്റിൽ 196 റൺസാണ് ധോണി നേടിയത്. സീസണിനിടെ നായകൻ ഋതുരാജ് ഗെയ്ക്വാദിന് പരിക്കേറ്റപ്പോൾ ടീമിനെ നയിച്ചതും ധോണിയായിരുന്നു. ഇത്തവണ പ്രശാന്ത് വീർ (14.20 കോടി), കാർത്തിക് ശർമ്മ (14.20 കോടി) തുടങ്ങിയ യുവതാരങ്ങളെ വലിയ തുകയ്ക്ക് ടീമിലെത്തിച്ച് സിഎസ്കെ തങ്ങളുടെ നിര പുതുക്കിയിട്ടുണ്ട്. സഞ്ജുവും ടീമിലെത്തി.
2026-ലേത് ധോണിയുടെ അവസാന ഐപിഎൽ സീസണായേക്കാം എന്ന സൂചനകൾക്കിടെ, പഴയ കാലത്തെ ഓർമ്മിപ്പിക്കുന്ന ഫിനിഷിംഗ് ഇന്നിംഗ്സുകൾക്കായി കാത്തിരിക്കുകയാണ് ആരാധകർ.
