മുംബൈയിൽ ന്യൂസിലൻഡിനെതിരായ മൂന്നാമത്തെയും അവസാനത്തെയും ടെസ്റ്റിൽ ഇന്ത്യയുടെ പ്രീമിയർ പേസർ ജസ്പ്രീത് ബുംറയ്ക്ക് വിശ്രമം അനുവദിച്ചു. ഓസ്ട്രേലിയയിൽ നടക്കാനിരിക്കുന്ന ബോർഡർ-ഗവാസ്കർ ട്രോഫിക്ക് തയ്യാറെടുക്കാൻ 31 കാരനായ വൈസ് ക്യാപ്റ്റന് വിശ്രമം നൽകാൻ ഇന്ത്യൻ മാനേജ്മെൻ്റ് തീരുമാനിച്ചു എന്നാണ് റിപ്പോർട്ടുകൾ.
ബുമ്ര ഇന്ത്യൻ ക്യാമ്പ് വിട്ട് നാട്ടിലേക്ക് മടങ്ങിയതായാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ഈ വർഷം ഇന്ത്യയുടെ 10 ടെസ്റ്റുകളിൽ ഒമ്പതും കളിച്ച ബുംറ 41 വിക്കറ്റ് വീഴ്ത്തിയിരുന്നു.
