കൊറോണ വൈറസ് ബാധയെ തുടർന്ന് പന്തിൽ ഉമിനീർ ഉപയോഗിക്കുന്നത് ഐ.സി.സി നിരോധിച്ചതോടെ ബൗളർമാർ റോബോട്ടുകളാകുമെന്ന് മുൻ പാകിസ്ഥാൻ ക്യാപ്റ്റൻ വസിം അക്രം. ബൗളർമാർ മത്സരത്തിൽ ഒരു സിങ്ങും ഇല്ലാതെ ബൗൾ ചെയ്യേണ്ടി വരുമെന്നും വസിം അക്രം പറഞ്ഞു.
ബൗൾ ചെയ്യുമ്പോൾ സിങ് ലഭിക്കാൻ വേണ്ടി ബൗളർമാർ പന്ത് പഴകുന്നത് വരെ ക്ഷമയോടെ കാത്തിരിക്കേണ്ടി വരുമെന്നും മുൻ പാകിസ്ഥാൻ ക്യാപ്റ്റൻ പറഞ്ഞു. പന്തിന് സിങ് ലഭിക്കാൻ വേണ്ടി താൻ വളർന്ന് വരുന്ന കാലം തൊട്ട് താൻ പന്തിൽ ഉമിനീർ ഉപയോഗിച്ചിരുന്നെന്നും എന്നാൽ കൊറോണ മഹാമാരിയുടെ ഘട്ടത്തിൽ ഉമിനീർ നിരോധിക്കാനുള്ള ഐ.സി.സിയുടെ തീരുമാനത്തെ താൻ അംഗീകരിക്കുന്നെന്നും അക്രം പറഞ്ഞു.
വാസ്‌ലീൻ പോലുള്ള കാര്യങ്ങൾ ഉപയോഗിക്കാനുള്ള നടപടികൾ ഐ.സി.സി കൈക്കൊള്ളണമെന്നും വിയർപ്പ് ഉപയോഗിച്ചാൽ പന്ത് കൂടുതൽ നനയുമെന്നും വസിം അക്രം പറഞ്ഞു. ഉമിനീരിൽ കൂടി കൊറോണ വൈറസ് പടരാനുള്ള സാഹചര്യം മുൻപിൽ കണ്ടുകൊണ്ടാണ് ഐ.സി.സി താത്കാലികമായി പന്തിൽ ഉമിനീർ ഉപയോഗിക്കുന്നത് നിരോധിക്കാൻ തീരുമാനിച്ചത്.
