പെര്‍ത്ത് ടെസ്റ്റിൽ ഓസ്ട്രേലിയയുടെ നടുവൊടിച്ച് ഇന്ത്യ. 487/6 എന്ന നിലയിൽ രണ്ടാം ഇന്നിംഗ്സ് ഡിക്ലയര്‍ ചെയ്ത് ഓസ്ട്രേലിയയ്ക്ക് മുന്നിൽ 534 റൺസ് വിജയ ലക്ഷ്യം ഇന്ത്യ നൽകിയപ്പോള്‍ രണ്ടാം ഇന്നിംഗ്സിൽ ഓസ്ട്രേലിയയുടെ 3 വിക്കറ്റ് കൂടി വീഴ്ത്തിയാണ് ഇന്ത്യ മൂന്നാം ദിവസം അവസാനിപ്പിച്ചത്.
12/3 എന്ന നിലയിലുള്ള ഓസ്ട്രേലിയയ്ക്ക് മുന്നിൽ ശ്രമകരമായ ദൗത്യമാണ് മുന്നിലുള്ളത്. നഥാന്‍ സ്വീനി, പാറ്റ് കമ്മിന്‍സ്, മാര്‍നസ് ലാബൂഷാനെ എന്നിവരുടെ വിക്കറ്റുകളാണ് ഓസ്ട്രേലിയയ്ക്ക് നഷ്ടമായത്. സ്വീനിയെയും ലാബൂഷാനെയെയും ബുംറ വിക്കറ്റിന് മുന്നിൽ കുടുക്കിയപ്പോള്‍ പാറ്റ് കമ്മിന്‍സിനെ സിറാജ് ആണ് വീഴ്ത്തിയത്. 3 റൺസ് നേടി ഖവാജയാണ് ക്രീസിലുള്ളത്.
നേരത്തെ യശസ്വി ജൈസ്വാള്‍ (161), വിരാട് കോഹ്‍ലി (100*) എന്നിവരുടെ ബാറ്റിംഗ് മികവാണ് ഇന്ത്യയ്ക്ക് മികച്ച സ്കോര്‍ നൽകിയത്.
