ഇന്ത്യയിൽ നടക്കാനിരിക്കുന്ന 2026 ഐസിസി പുരുഷ ടി20 ലോകകപ്പിൽ നിന്ന് സുരക്ഷാ കാരണങ്ങൾ മുൻനിർത്തി പിന്മാറാനുള്ള ബംഗ്ലാദേശിന്റെ തീരുമാനം ആ രാജ്യത്തെ ക്രിക്കറ്റ് ബോർഡിനെ കടുത്ത പ്രതിസന്ധിയിലാക്കുന്നു. സർക്കാർ കായിക ഉപദേശകൻ ആസിഫ് നസ്റുൽ ഉന്നയിച്ച സുരക്ഷാ ആശങ്കകളെത്തുടർന്നാണ് പിന്മാറ്റ നീക്കം.
ബിസിബി (BCB) പ്രസിഡന്റ് അമിനുൽ ഇസ്ലാം ബുൾബുളിന് കീഴിൽ ബംഗ്ലാദേശ് ഒരു ഐസിസി ടൂർണമെന്റ് ഒഴിവാക്കുന്നത് ഇതാദ്യമായാണ്. ഈ പിന്മാറ്റം വഴി ഐസിസിയിൽ നിന്നുള്ള വാർഷിക വരുമാനത്തിൽ മാത്രം ഏകദേശം 27 മില്യൺ ഡോളറിന്റെ (325 കോടി ടാക്ക) നഷ്ടമാണ് ബംഗ്ലാദേശിന് ഉണ്ടാകാൻ പോകുന്നത്.
സംപ്രേക്ഷണാവകാശത്തിലൂടെയും സ്പോൺസർഷിപ്പിലൂടെയും ലഭിക്കേണ്ട തുക കൂടി കണക്കിലെടുത്താൽ ഈ സാമ്പത്തിക വർഷത്തെ ആകെ വരുമാനത്തിന്റെ 60 ശതമാനത്തിലധികം നഷ്ടം സംഭവിക്കാം.
കൊൽക്കത്തയിലും മുംബൈയിലുമായി നിശ്ചയിച്ചിരുന്ന തങ്ങളുടെ മത്സരങ്ങൾ ശ്രീലങ്കയിലേക്ക് മാറ്റണമെന്ന ബംഗ്ലാദേശിന്റെ ആവശ്യം ഐസിസി തള്ളിയതാണ് നിലവിലെ തർക്കത്തിന് കാരണം. ഇന്ത്യയിൽ കളിക്കുന്നതിനെതിരെയുള്ള പൊതുവികാരം കണക്കിലെടുത്ത് ദേശീയ അന്തസ്സിനാണ് മുൻഗണന നൽകുന്നതെന്ന് ആസിഫ് നസ്റുൽ വ്യക്തമാക്കിയിരുന്നു. മത്സരങ്ങൾ നടന്നില്ലെങ്കിലും താരങ്ങൾക്ക് മാച്ച് ഫീ നൽകുമെന്ന് ബോർഡ് ഉറപ്പുനൽകിയിട്ടുണ്ടെങ്കിലും, ആഗോള വേദിയിൽ കളിക്കാനുള്ള വലിയ അവസരമാണ് അവർക്ക് നഷ്ടമാകുന്നത്. കൂടാതെ, വരാനിരിക്കുന്ന ഇന്ത്യയുടെ ബംഗ്ലാദേശ് പര്യടനത്തെയും ഈ നീക്കം ബാധിച്ചേക്കാം. പത്ത് ഉഭയകക്ഷി പരമ്പരകൾക്ക് തുല്യമായ ടിവി വരുമാനം ലഭിക്കുന്ന ഈ പര്യടനം മുടങ്ങുന്നത് ബംഗ്ലാദേശ് ക്രിക്കറ്റിന് താങ്ങാവുന്നതിലും അപ്പുറമായിരിക്കും.
