വമ്പന് തോല്വികള് ഏറ്റുവാങ്ങിയിരുന്ന ടീമില് നിന്ന് വമ്പന് വിജയം നേടുന്ന ടീമായി മാറിയ ബംഗ്ലാദേശ് ടെസ്റ്റ് ക്രിക്കറ്റില് ശരിയായ ദിശയിലാണ് യാത്ര ചെയ്യുന്നതെന്ന് അഭിപ്രായപ്പെട്ട് ടീം നായകന് ഷാക്കിബ് അല് ഹസന്. ബംഗ്ലാദേശ് വിന്ഡീസില് ചെന്ന് കൂറ്റന് തോല്വിയേറ്റു വാങ്ങിയ ശേഷം മറുപടി പരമ്പരയില് അതേ നാണയത്തില് തിരിച്ചടിച്ച് വിന്ഡീസിനെതിരെ 2-0 എന്ന നിലയില് പരമ്പര സ്വന്തമാക്കിയിരുന്നു.
വിന്ഡീസിലെ പ്രകടനത്തിനു ശേഷം ടീമിനു അതേ എതിരാളികളോട് അധികമൊന്നും ചെയ്യാനുണ്ടായിരുന്നില്ലെന്നായിരുന്നു പലരും കരുതിയതെന്ന് പറഞ്ഞ ഷാക്കിബ്, തങ്ങള്ക്ക് ഹോം ഗ്രൗണ്ട് ആനുകൂല്യം തീര്ച്ചയായും ഉണ്ടായിരുന്നുവെന്നും തുറന്നു പറഞ്ഞു. വിന്ഡീസിനെ ഫോളോ ഓണ് ചെയ്യാന് ആവശ്യപ്പെട്ടത് തന്നെ തങ്ങള്ക്കൊരു ചരിത്ര നിമിഷമായിരുന്നുവെന്നാണ് ഷാക്കിബ് അഭിപ്രായപ്പെട്ടത്.
വിന്ഡീസിനെതിരെയുള്ള ഈ പരമ്പര ജയം സൂചിപ്പിക്കുന്നത് തങ്ങള് ശരിയായ ദിശയിലാണെന്നതാണെന്നും ഷാക്കിബ് പറഞ്ഞു. ഈ വിജയം ഏറെ പ്രത്യേകതകളുള്ളതാണെന്നും ഷാക്കിബ് വ്യക്തമാക്കി.