അഡ്ലെയ്ഡ് ഓവലിൽ നടക്കുന്ന മൂന്നാം ആഷസ് ടെസ്റ്റിന്റെ മൂന്നാം ദിനം ചായസമയത്ത് കളി അവസാനിക്കുമ്പോൾ ഓസ്ട്രേലിയ മത്സരത്തിൽ മികച്ച മുൻതൂക്കം നേടി. രണ്ടാം ഇന്നിംഗ്സിൽ 2 വിക്കറ്റ് നഷ്ടത്തിൽ 119 റൺസെടുത്ത ഓസ്ട്രേലിയയ്ക്ക് ഇപ്പോൾ മൊത്തം 204 റൺസിന്റെ ലീഡുണ്ട്. 94 പന്തിൽ നിന്ന് 6 ഫോറുകളും ഒരു സിക്സറുമടക്കം 68 റൺസെടുത്ത ട്രാവിസ് ഹെഡിന്റെ തകർപ്പൻ ബാറ്റിംഗാണ് രണ്ടാം ഇന്നിംഗ്സിൽ ആതിഥേയർക്ക് കരുത്തായത്.
നേരത്തെ, ഓസ്ട്രേലിയയുടെ ഒന്നാം ഇന്നിംഗ്സ് സ്കോറായ 371-ന് മറുപടിയായി ബാറ്റിംഗിനിറങ്ങിയ ഇംഗ്ലണ്ട് 286 റൺസിന് ഓൾ ഔട്ടായി. ബെൻ സ്റ്റോക്സും (45) ജോഫ്ര ആർച്ചറും (51) ചേർന്ന് ഒൻപതാം വിക്കറ്റിൽ പടുത്തുയർത്തിയ 73 റൺസിന്റെ പോരാട്ടം ഇംഗ്ലണ്ടിന് അല്പം ആശ്വാസം നൽകി. പാറ്റ് കമ്മിൻസും സ്കോട്ട് ബോളണ്ടും ചേർന്നാണ് ഇംഗ്ലണ്ടിന്റെ വാലറ്റത്തെ തകർത്തത്. 85 റൺസിന്റെ ഒന്നാം ഇന്നിംഗ്സ് ലീഡുമായാണ് ഓസ്ട്രേലിയ രണ്ടാം ഇന്നിംഗ്സ് ആരംഭിച്ചത്.
രണ്ടാം ഇന്നിംഗ്സിൽ തുടക്കത്തിൽ തന്നെ ജേക്ക് വെതറാൾഡിനെ (1) നഷ്ടമായെങ്കിലും ട്രാവിസ് ഹെഡും മാർനസ് ലബുഷെയ്നും ചേർന്ന് ഇന്നിംഗ്സ് മുന്നോട്ട് നയിച്ചു. ലബുഷെയ്ൻ (13) പുറത്തായ ശേഷം ക്രീസിലെത്തിയ ഉസ്മാൻ ഖവാജയെ കൂട്ടുപിടിച്ച് ഹെഡ് സ്കോറിംഗ് വേഗത വർദ്ധിപ്പിച്ചു. നിലവിൽ ഹെഡും ഖവാജയും ചേർന്ന് മൂന്നാം വിക്കറ്റിൽ 66 റൺസ് കൂട്ടിച്ചേർത്തിട്ടുണ്ട്. ഇംഗ്ലണ്ടിന് വേണ്ടി ബ്രൈഡൻ കാർസും ജോഷ് ടംഗും ഓരോ വിക്കറ്റ് വീതം വീഴ്ത്തി.
