വനിതാ പ്രീമിയർ ലീഗിന്റെ (WPL) 2026 സീസണിലും ഓസ്ട്രേലിയൻ ഓൾറൗണ്ടർ ആഷ്ലി ഗാർഡ്നർ ഗുജറാത്ത് ജയന്റ്സിനെ നയിക്കും. കഴിഞ്ഞ സീസണിൽ ടീമിനെ ആദ്യമായി പ്ലേഓഫിലെത്തിച്ച ഗാർഡ്നറുടെ നേതൃത്വത്തിൽ ക്ലബ്ബ് പൂർണ്ണ വിശ്വാസം അർപ്പിച്ചിരിക്കുകയാണ്. ഡിസംബർ 29-ന് സമൂഹമാധ്യമങ്ങളിലൂടെയാണ് ക്ലബ്ബ് ഈ ഔദ്യോഗിക പ്രഖ്യാപനം നടത്തിയത്.
28-കാരിയായ ഗാർഡ്നറെ 3.50 കോടി രൂപയ്ക്കാണ് ഗുജറാത്ത് ജയന്റ്സ് ടീമിൽ നിലനിർത്തിയത്. 2023-ൽ ലീഗ് ആരംഭിച്ചത് മുതൽ ടീമിന്റെ അവിഭാജ്യ ഘടകമായ താരം ഇതുവരെ 25 മത്സരങ്ങളിൽ നിന്ന് 568 റൺസും 25 വിക്കറ്റുകളും നേടിയിട്ടുണ്ട്. കഴിഞ്ഞ സീസണിൽ 164.18 എന്ന മികച്ച സ്ട്രൈക്ക് റേറ്റിൽ 243 റൺസ് നേടിയ താരം ടീമിന്റെ ടോപ്പ് സ്കോററായിരുന്നു. ഓസ്ട്രേലിയൻ സഹതാരം ബെത്ത് മൂണിയിൽ നിന്നാണ് കഴിഞ്ഞ വർഷം ഗാർഡ്നർ ക്യാപ്റ്റൻ സ്ഥാനം ഏറ്റെടുത്തത്.
