അഹമ്മദാബാദിലെ നരേന്ദ്ര മോഡി സ്റ്റേഡിയത്തില്‍ ഇന്ന് ടെസ്റ്റിന്റെ രണ്ടാം ദിവസം ആദ്യ രണ്ട് സെഷനുകള്‍ അവസാനിക്കുമ്പോള്‍ വീണത് 17 വിക്കറ്റുകള്‍. ഇംഗ്ലണ്ട് ഇന്നിംഗ്സ് അവസാനിക്കുമ്പോള്‍ ബാറ്റ്സ്മാന്മാര്‍ നേടിയതാകട്ടെ വെറും 127 റണ്‍സ്. ഇതില്‍ ഇന്ത്യ ഇന്ന് 46 റണ്‍സാണ് നേടിയത്. 99/3 എന്ന നിലയില്‍ നിന്ന് ബാറ്റിംഗ് പുനരാരംഭിച്ച ഇന്ത്യ ഒരു ഘട്ടത്തില്‍ 114/3 എന്ന നിലയിലേക്ക് എത്തിയെങ്കിലും പിന്നീട് 31 റണ്‍സ് നേടുന്നതിനിടെ ഇന്ത്യയുടെ ഏഴ് വിക്കറ്റ് നഷ്ടപ്പെടുകയായിരുന്നു.
അതേ സമയം ഇംഗ്ലണ്ടിന്റെ രണ്ടാം ഇന്നിംഗ്സ് 81 റണ്‍സില്‍ അവസാനിച്ചപ്പോള്‍ ബൗളര്‍മാര്‍ 17 വിക്കറ്റ് ഇന്നേ ദിവസം കരസ്ഥമാക്കി. ഇനി ഒരു സെഷന്‍ കൂടി ഇന്ന് അവശേഷിക്കവേ എത്ര വിക്കറ്റ് കൂടി ബൗളര്‍മാര്‍ക്ക് നേടാനാകുമെന്നാണ് ഏവരും കാത്തിരിക്കുന്നത്.
ഇന്ത്യ തങ്ങളുടെ രണ്ടാം ഇന്നിംഗ്സില്‍ നേടിയ 11 റണ്‍സ് കൂടി പരിഗണിക്കുമ്പോള്‍ 138 റണ്‍സാണ് ഈ രണ്ട് സെഷനിലായി പിറന്നത്.
