പ്രൊ കബഡി ലീഗ് സീസണ്‍ ആറിലെ ത്രില്ലര്‍ മത്സരത്തില്‍ വിജയം പിടിച്ചെടുത്ത് മുംബൈ. അത്യന്തം ആവേശകരമായ മത്സരത്തില്‍ 40-39 എന്ന സ്കോറിനാണ് മുംബൈ പട്ന പൈറേറ്റിസിനെ കീഴടക്കിയത്. മത്സരം അവസാന രണ്ട് മിനുട്ടിലേക്ക് കടന്നപ്പോള്‍ 38-36നു ലീഡ് പട്നയുടെ കൈകളിലായിരുന്നുവെങ്കിലും ആവേശകരമായി വിജയം സ്വന്തമാക്കുവാന്‍ മുംബൈയ്ക്ക് സാധിക്കുകയായിരുന്നു. ഇടവേള സമയത്ത് ഇരു ടീമുകളും 14 പോയിന്റ് വീതം നേടിയാണ് ക്രീസില്‍ നിന്നിരുന്നത്.
പട്നയുടെ പര്‍ദീപ് നര്‍വാല്‍ ആണ് 17 പോയിന്റുമായി മത്സരത്തിലെ ടോപ് സ്കോറര്‍. യു മുംബൈയ്ക്കായി സിദ്ധാര്‍ത്ഥ് ദേശായി 15 പോയിന്റ് നേടിയപ്പോള്‍ രോഹിത് ബലിയന്‍ 11 പോയിന്റും ഫസല്‍ അത്രച്ചാലി 6 പോയിന്റും നേടി ടീം വര്‍ക്കിലൂടെ വിജയം സ്വന്തമാക്കി. റെയിഡിംഗില്‍ 26-23 എന്ന സ്കോറിനു മുംബൈ മുന്നിട്ട് നിന്നപ്പോള്‍ 12-7 എന്ന നിലയില്‍ പ്രതിരോധത്തിലും മുംബൈ മെച്ചം പുലര്‍ത്തി.
എന്നാല്‍ രണ്ട് തവണ മുംബൈയെ ഓള്‍ഔട്ട് ആക്കി നാല് ഓള്‍ഔട്ട് പോയിന്റുകള്‍ പട്ന സ്വന്തമാക്കി. പട്ന 5 അധിക പോയിന്റുകള്‍ നേടിയപ്പോള്‍ മുംബൈയ്ക്ക് രണ്ട് പോയിന്റുകള്‍ മാത്രമേയുള്ളു.
