ബ്രസീലിയൻ മിഡ്ഫീൽഡർ ലൂക്കാസ് പക്വെറ്റ തന്റെ പഴയ തട്ടകമായ ഫ്ലെമെംഗോയിലേക്ക് റെക്കോർഡ് തുകയ്ക്ക് തിരിച്ചെത്തുന്നു. ഇംഗ്ലീഷ് ക്ലബ്ബായ വെസ്റ്റ് ഹാം യുണൈറ്റഡിൽ നിന്ന് 42 ദശലക്ഷം യൂറോയ്ക്കാണ് (ഏകദേശം 36 ദശലക്ഷം പൗണ്ട്) താരം ബ്രസീലിലേക്ക് മടങ്ങുന്നത്. ഇതോടെ ബ്രസീലിയൻ സീരി എ ചരിത്രത്തിലെ ഏറ്റവും വിലപിടിപ്പുള്ള താരമായി പക്വെറ്റ മാറി.
അഞ്ച് വർഷത്തെ കരാറിലാണ് 28-കാരനായ താരം ഒപ്പിടുന്നത്. വെസ്റ്റ് ഹാമിന് ഒരു താരം വഴിയുണ്ടാകുന്ന ഏറ്റവും വലിയ വരുമാനമാണിത്. ഏറെ നാളത്തെ ചർച്ചകൾക്ക് ശേഷമാണ് വെസ്റ്റ് ഹാം താരത്തെ വിട്ടുനൽകാൻ സമ്മതിച്ചത്. ഇംഗ്ലണ്ടിലെ വാതുവെപ്പ് വിവാദങ്ങളിൽ നിന്ന് മുക്തനായ പാക്വെറ്റ, ജന്മനാട്ടിലേക്ക് മടങ്ങാനുള്ള ആഗ്രഹം പ്രകടിപ്പിച്ചതാണ് ചർച്ചകൾ വേഗത്തിലാക്കിയത്. വെസ്റ്റ് ഹാം ആദ്യം വായ്പ അടിസ്ഥാനത്തിൽ (Loan) താരത്തെ നിലനിർത്താൻ ശ്രമിച്ചെങ്കിലും ഫ്ലെമെംഗോയുടെ കടുത്ത നിലപാടുകൾക്ക് മുന്നിൽ വഴങ്ങുകയായിരുന്നു. എസി മിലാൻ, ലിയോൺ തുടങ്ങിയ വമ്പൻ ക്ലബ്ബുകളിൽ കളിച്ച പാക്വെറ്റയുടെ വരവ് ഫ്ലെമെംഗോയുടെ കരുത്ത് വർദ്ധിപ്പിക്കും.
താരത്തിന്റെ വിപണി മൂല്യത്തേക്കാൾ കുറഞ്ഞ തുകയ്ക്കാണ് വെസ്റ്റ് ഹാം വിട്ടുകൊടുത്തതെങ്കിലും, ടീമിൽ വലിയ മാറ്റങ്ങൾ കൊണ്ടുവരാൻ ഈ പണം സഹായിക്കുമെന്ന് ക്ലബ്ബ് കരുതുന്നു. 2026 ലോകകപ്പിന് മുന്നോടിയായി ബ്രസീൽ ദേശീയ ടീമിൽ കൂടുതൽ സജീവമാകാൻ ജന്മനാട്ടിലെ ഈ മടക്കം പാക്വെറ്റയെ സഹായിക്കും.
