യുവ മിഡ്ഫീൽഡർ കോബി മൈനൂവുമായുള്ള കരാർ ചർച്ചകൾ മാഞ്ചസ്റ്റർ യുണൈറ്റഡ് വീണ്ടും സജീവമാക്കി. നിലവിൽ ആഴ്ചയിൽ 20,000 പൗണ്ട് പ്രതിഫലം വാങ്ങുന്ന ഈ ഇരുപതുകാരന്, ടീമിലെ സീനിയർ താരങ്ങൾക്ക് തുല്യമായ ശമ്പള വർദ്ധനവ് നൽകാനാണ് ക്ലബ്ബ് ലക്ഷ്യമിടുന്നത്. മുൻപ് നടന്ന ചർച്ചകൾ ചില സാങ്കേതിക കാരണങ്ങളാൽ തടസ്സപ്പെട്ടിരുന്നെങ്കിലും, ഇടക്കാല പരിശീലകൻ മൈക്കൽ കാരിക്കിന് കീഴിൽ മൈനൂ നടത്തുന്ന തകർപ്പൻ പ്രകടനം കണക്കിലെടുത്ത് കരാർ നടപടികൾ വേഗത്തിലാക്കാൻ യുണൈറ്റഡ് തീരുമാനിക്കുകയായിരുന്നു.
2027 വരെയാണ് താരത്തിന് നിലവിൽ കരാറുള്ളതെങ്കിലും, ഒരു വർഷം കൂടി നീട്ടാനുള്ള അധികാരം ക്ലബ്ബിനുണ്ട്.
കാസെമിറോ ടീം വിടുന്നതോടെ യുണൈറ്റഡ് മിഡ്ഫീൽഡിലെ ഒഴിവാക്കാനാവാത്ത സാന്നിധ്യമായി മൈനൂ മാറിയിരിക്കുകയാണ്. പുതിയ കരാർ പ്രകാരം താരത്തിന്റെ ആഴ്ചയിലുള്ള പ്രതിഫലം 60,000 പൗണ്ടിനും 1,10,000 പൗണ്ടിനും ഇടയിലായി വർദ്ധിപ്പിക്കാനാണ് ക്ലബ്ബ് ആലോചിക്കുന്നത്. കഴിഞ്ഞ വേനൽക്കാലത്ത് താരത്തെ ലോണിൽ അയക്കാൻ ആലോചനകൾ നടന്നിരുന്നെങ്കിലും, നിലവിൽ ക്ലബ്ബിന്റെ ഭാവി പദ്ധതികളുടെ പ്രധാന തൂണായി മൈനൂ സ്വയം അടയാളപ്പെടുത്തിക്കഴിഞ്ഞു.
