2026-ലെ ടി20 ലോകകപ്പിന് ആഴ്ചകൾ മാത്രം ബാക്കിനിൽക്കെ, തങ്ങളുടെ പങ്കാളിത്തത്തെക്കുറിച്ചും മത്സരക്രമത്തെക്കുറിച്ചും താരങ്ങൾക്കിടയിൽ നിലനിൽക്കുന്ന കടുത്ത ആശയക്കുഴപ്പം വെളിപ്പെടുത്തി ബംഗ്ലാദേശ് നായകൻ ലിറ്റൺ ദാസ്.
ഇന്ത്യയിൽ നടക്കേണ്ട ഗ്രൂപ്പ് ഘട്ട മത്സരങ്ങളിൽ പങ്കെടുക്കാൻ ബംഗ്ലാദേശ് ക്രിക്കറ്റ് ബോർഡും (BCB) സർക്കാരും വിസമ്മതിക്കുന്ന പശ്ചാത്തലത്തിലാണ് ഈ അനിശ്ചിതത്വം. ഫെബ്രുവരി 7-ന് വെസ്റ്റ് ഇൻഡീസിനെതിരെ കൊൽക്കത്തയിലാണ് ബംഗ്ലാദേശിന്റെ ആദ്യ മത്സരം നിശ്ചയിച്ചിരിക്കുന്നത്. എന്നാൽ ഇന്ത്യയിലേക്ക് ടീമിനെ അയക്കില്ലെന്ന നിലപാടിൽ ബോർഡ് ഉറച്ചുനിൽക്കുന്നതോടെ തങ്ങൾ ആർക്കെതിരെയാണ് എവിടെയാണ് കളിക്കേണ്ടതെന്ന് വ്യക്തതയില്ലെന്ന് ലിറ്റൺ പറഞ്ഞു.
ബംഗ്ലാദേശ് പ്രീമിയർ ലീഗിന് (BPL) ശേഷം മാധ്യമങ്ങളോട് സംസാരിക്കവെയാണ് താരം തന്റെ നിരാശ പ്രകടിപ്പിച്ചത്. ലോകകപ്പിലെ തങ്ങളുടെ എതിരാളികൾ ആരാണെന്നോ ഏത് രാജ്യത്താണ് മത്സരങ്ങൾ നടക്കുകയെന്നോ മുൻകൂട്ടി അറിയാൻ സാധിച്ചിരുന്നെങ്കിൽ അത് ടീമിന് മികച്ച രീതിയിൽ തയ്യാറെടുക്കാൻ സഹായിക്കുമായിരുന്നുവെന്ന് അദ്ദേഹം ചൂണ്ടിക്കാട്ടി. തന്നെപ്പോലെ തന്നെ ഓരോ ബംഗ്ലാദേശ് താരവും നിലവിൽ കടുത്ത അനിശ്ചിതത്വത്തിലാണെന്നും അദ്ദേഹം കൂട്ടിച്ചേർത്തു.
മുസ്തഫിസുർ റഹ്മാനെ ഐപിഎല്ലിൽ നിന്ന് ഒഴിവാക്കിയതും സംപ്രേഷണ വിലക്കും സൃഷ്ടിച്ച നയതന്ത്ര തർക്കങ്ങൾക്കിടയിൽ താരങ്ങളുടെ ശ്രദ്ധ മത്സരങ്ങളിൽ നിന്ന് മാറുന്നത് വലിയ പ്രതിസന്ധിയാണ് സൃഷ്ടിക്കുന്നത്.
ലോകകപ്പ് ആരംഭിക്കാൻ ഇനിയും സമയമുണ്ടെന്നും തങ്ങൾ ടൂർണമെന്റിൽ പങ്കെടുക്കുമോ എന്ന കാര്യത്തിൽ ഉറപ്പില്ലാത്തതിനാൽ മാനസികമായി തയ്യാറെടുക്കാൻ പ്രയാസമാണെന്നും ലിറ്റൺ ദാസ് പറഞ്ഞു. ഐസിസിയുടെ അന്തിമ തീരുമാനം ഇന്നുണ്ടാകുമെന്നാണ് പ്രതീക്ഷിക്കപ്പെടുന്നത്.
