ബുലവായോയിലെ ക്വീൻസ് സ്പോർട്സ് ക്ലബ്ബിൽ നടന്ന ഐസിസി അണ്ടർ-19 ലോകകപ്പിലെ ആവേശകരമായ ഗ്രൂപ്പ് എ മത്സരത്തിൽ ബംഗ്ലാദേശിനെ 18 റൺസിന് പരാജയപ്പെടുത്തി ഇന്ത്യ ഉജ്ജ്വല വിജയം സ്വന്തമാക്കി. മഴ തടസ്സപ്പെടുത്തിയ മത്സരത്തിൽ ഡി.എൽ.എസ് (DLS) നിയമപ്രകാരം 29 ഓവറിൽ 165 റൺസായിരുന്നു ബംഗ്ലാദേശിന്റെ പുതുക്കിയ വിജയലക്ഷ്യം. എന്നാൽ ഇന്ത്യൻ ബൗളിംഗ് നിരയുടെ കൃത്യതയാർന്ന പ്രകടനത്തിന് മുന്നിൽ പതറിയ ബംഗ്ലാദേശ് 28.3 ഓവറിൽ 146 റൺസിന് എല്ലാവരും പുറത്തായി.
നാല് ഓവറിൽ വെറും 14 റൺസ് മാത്രം വഴങ്ങി നാല് വിക്കറ്റുകൾ വീഴ്ത്തിയ വിഹാൻ മൽഹോത്രയാണ് ഇന്ത്യയുടെ വിജയത്തിൽ നിർണ്ണായക പങ്കുവഹിച്ചത്.
നേരത്തെ ബാറ്റിംഗിനിറങ്ങിയ ഇന്ത്യ വൈഭവ് സൂര്യവംശിയുടെയും (72) അഭിജ്ഞാൻ കുന്ദുവിന്റെയും (80) അർദ്ധ സെഞ്ച്വറികളുടെ കരുത്തിൽ 48.4 ഓവറിൽ 238 റൺസെടുത്തിരുന്നു. ബംഗ്ലാദേശിനായി അൽ ഫഹദ് അഞ്ച് വിക്കറ്റുകൾ വീഴ്ത്തി മികച്ച പ്രകടനം നടത്തി. മറുപടി ബാറ്റിംഗിൽ ബംഗ്ലാദേശ് ഓപ്പണർമാരായ ജവാദ് അബ്രാർ, റിഫാത്ത് ബേഗ് എന്നിവർ ചേർന്ന് പവർപ്ലേയിൽ 54 റൺസ് നേടി മികച്ച തുടക്കമാണ് നൽകിയത്. ഒരു ഘട്ടത്തിൽ 62-ന് 1 എന്ന ശക്തമായ നിലയിലായിരുന്നു ബംഗ്ലാദേശ്. ക്യാപ്റ്റൻ അസീസുൽ ഹക്കിം തമീം (51) അർദ്ധ സെഞ്ച്വറിയുമായി പൊരുതി നോക്കിയെങ്കിലും മധ്യനിരയിൽ വിഹാൻ മൽഹോത്ര നടത്തിയ വിക്കറ്റ് വേട്ട ബംഗ്ലാദേശിനെ തകർത്തു.
കലാം സിദ്ദിഖി അലീൻ, ഷെയ്ഖ് പർവേസ് ജിബോൺ, റിസാൻ ഹുസൈൻ, ഇക്ബാൽ ഹുസൈൻ ഇമൻ എന്നിവരുടെ വിക്കറ്റുകൾ വീഴ്ത്തിയാണ് വിഹാൻ ഇന്ത്യൻ വിജയമുറപ്പിച്ചത്. ക്യാപ്റ്റൻ തമീമിനെ പുറത്താക്കിയ ഖിലാൻ പട്ടേൽ രണ്ട് വിക്കറ്റുകൾ നേടി മികച്ച പിന്തുണ നൽകി. ദീപേഷ് ദേവേന്ദ്രൻ, ഹെനിൽ പട്ടേൽ എന്നിവർ ഓരോ വിക്കറ്റ് വീതവും വീഴ്ത്തി. ഒരു ഘട്ടത്തിൽ വിജയത്തിലേക്ക് നീങ്ങുമെന്ന് തോന്നിച്ച ബംഗ്ലാദേശിന് കൃത്യമായ ഇടവേളകളിൽ വിക്കറ്റുകൾ നഷ്ടമായത് തിരിച്ചടിയായി.
