കഴിഞ്ഞ ആഴ്ച ബോൺമൗത്തിനെതിരായ പ്രീമിയർ ലീഗ് മത്സരത്തിനിടെ ഹാംസ്ട്രിംഗിന് പരിക്കേറ്റ ടോട്ടനം ഹോട്സ്പർ താരം റോഡ്രിഗോ ബെന്റൻകൂറിന് ദീർഘകാലം വിശ്രമം വേണ്ടിവരും. പരിക്കേറ്റ പേശികളിലെ കീറൽ പരിഹരിക്കാൻ ശസ്ത്രക്രിയ അനിവാര്യമാണെന്നും 28-കാരനായ ഈ ഉറുഗ്വേ താരം ചുരുങ്ങിയത് മൂന്ന് മാസത്തോളം മൈതാനത്തിന് പുറത്തിരിക്കുമെന്നുമാണ് റിപ്പോർട്ടുകൾ
ഇതോടെ 2026 ഏപ്രിൽ പകുതിയോടെ മാത്രമേ ബെന്റൻകൂറിന് തിരിച്ചെത്താൻ സാധിക്കൂ. തോമസ് ഫ്രാങ്കിന്റെ പരിശീലനത്തിന് കീഴിൽ ലീഗിലും ചാമ്പ്യൻസ് ലീഗിലും സ്ഥിരസാന്നിധ്യമായിരുന്ന താരം ബോൺമൗത്തിനെതിരായ മത്സരത്തിന്റെ 86-ാം മിനിറ്റിലാണ് പരിക്കേറ്റ് പിന്മാറിയത്. പരിക്കിന്റെ തീവ്രത കണക്കിലെടുത്ത് ശസ്ത്രക്രിയ നടത്താൻ തീരുമാനിച്ചതോടെ ബെന്റൻകൂറിന്റെ 2026 ലോകകപ്പ് സാധ്യതകളും ആശങ്കയിലായിരിക്കുകയാണ്.
നിലവിൽ പരിക്കിന്റെ പിടിയിലുള്ള കുലുസെവ്സ്കി, കുഡൂസ്, മാഡിസൺ, റിച്ചാർലിസൺ എന്നിവർക്കൊപ്പം ബെന്റൻകൂറും പുറത്തായത് ടോട്ടനത്തിന് വലിയ തിരിച്ചടിയാണ്.
