ലിവർപൂളിന്റെ യുവ ഡിഫൻഡർ കോണർ ബ്രാഡ്ലിക്ക് ശസ്ത്രക്രിയ വേണ്ടി വരും. ഇതിനു പിന്നാലെ ഈ സീസണിലെ അവശേഷിക്കുന്ന മത്സരങ്ങൾ താരത്തിന് നഷ്ടമാകും എന്ന് ഉറപ്പായി. കഴിഞ്ഞ വ്യാഴാഴ്ച ആഴ്സണലിനെതിരെ നടന്ന പ്രീമിയർ ലീഗ് മത്സരത്തിനിടെയാണ് താരത്തിന് ഗുരുതരമായി പരിക്കേറ്റത്. മത്സരത്തിന്റെ അവസാന മിനിറ്റുകളിൽ പന്തിനായി ഓടുന്നതിനിടെ ഇടതുമുട്ടിന് പരിക്കേറ്റ ബ്രാഡ്ലിയെ സ്ട്രെച്ചറിലാണ് മൈതാനത്തിന് പുറത്തേക്ക് കൊണ്ടുപോയത്.
പരിശോധനയിൽ താരത്തിന്റെ മുട്ടിലെ അസ്ഥികൾക്കും ലിഗമെന്റുകൾക്കും (ligaments) കാര്യമായ ക്ഷതമേറ്റതായി കണ്ടെത്തി. എസിഎൽ (ACL) തകരാർ ഒഴിവായത് നേരിയ ആശ്വാസമാണെങ്കിലും, പരിക്കിന്റെ തീവ്രത കണക്കിലെടുത്ത് ശസ്ത്രക്രിയ അനിവാര്യമാണെന്ന് ലിവർപൂൾ സ്ഥിരീകരിച്ചു. അടുത്ത കുറച്ചുദിവസങ്ങൾക്കുള്ളിൽ ശസ്ത്രക്രിയ നടക്കും. അതിനുശേഷം ലിവർപൂളിന്റെ എഎക്സ്എ (AXA) ട്രെയിനിംഗ് സെന്ററിൽ താരം പുനരധിവാസ പ്രവർത്തനങ്ങൾ ആരംഭിക്കും.
