ടി20 ലോകകപ്പിന് ആഴ്ചകൾ മാത്രം ബാക്കിനിൽക്കെ, വെടിക്കെട്ട് ബാ ബാറ്റർ ടിം ഡേവിഡിനേറ്റ പരിക്ക് ഓസ്ട്രേലിയൻ ടീമിനെ ആശങ്കയിലാഴ്ത്തുന്നു. ബിഗ് ബാഷ് ലീഗിൽ (BBL) പെർത്ത് സ്കോർച്ചേഴ്സിനെതിരെ ഹോബാർട്ട് ഹറിക്കെയ്ൻസിന് വേണ്ടി കളിക്കുന്നതിനിടെയാണ് താരത്തിന് ഹാംസ്ട്രിംഗ് പരിക്ക് ഏറ്റത്.
മത്സരത്തിൽ 28 പന്തിൽ നിന്ന് 42 റൺസെടുത്ത് മികച്ച ഫോമിൽ നിൽക്കുകയായിരുന്ന ഡേവിഡ്, ഒരു റണ്ണിനായി ഓടുന്നതിനിടെയാണ് അസ്വസ്ഥത പ്രകടിപ്പിച്ചത്. തുടർന്ന് ‘റിട്ടയേർഡ് ഹർട്ട്’ ആയി താരം മൈതാനം വിട്ടു.
ഫെബ്രുവരി 7-ന് ഇന്ത്യയിലും ശ്രീലങ്കയിലുമായി ആരംഭിക്കുന്ന ലോകകപ്പിന് മുൻപ് ഈ പരിക്ക് വലിയൊരു തിരിച്ചടിയാണ്. പരിക്കിൽ നിന്ന് മുക്തനാകാൻ താരത്തിന് വളരെ കുറഞ്ഞ സമയം മാത്രമേ ലഭിക്കൂ. പരിക്കിന്റെ തീവ്രത അറിയാൻ ഡേവിഡിനെ കൂടുതൽ സ്കാനിംഗുകൾക്ക് വിധേയനാക്കുമെന്ന് ഹോബാർട്ട് ഹറിക്കെയ്ൻസ് അറിയിച്ചു. ഈ വർഷം ഐപിഎല്ലിനിടെ ഏറ്റ ഹാംസ്ട്രിംഗ് പരിക്ക് കാരണം രണ്ട് മാസത്തോളം താരം വിട്ടുനിന്നിരുന്നു എന്നതും ആശങ്ക വർദ്ധിപ്പിക്കുന്നു.
ഓസ്ട്രേലിയയുടെ വൈറ്റ് ബോൾ ക്രിക്കറ്റിലെ ഏറ്റവും നിർണ്ണായകമായ സാന്നിധ്യമാണ് ടിം ഡേവിഡ്. മധ്യനിരയിൽ കളി ഫിനിഷ് ചെയ്യാനുള്ള താരത്തിന്റെ കഴിവ് ടീമിന് ഒഴിച്ചുകൂടാനാവാത്തതാണ്. ദക്ഷിണാഫ്രിക്കയ്ക്കെതിരായ പരമ്പരയിലെ മികച്ച പ്രകടനം അദ്ദേഹത്തിന് ‘പ്ലെയർ ഓഫ് ദി സീരീസ്’ പുരസ്കാരം നേടിക്കൊടുത്തിരുന്നു.
