ലിവർപൂളും വോൾവർഹാംപ്ടൺ വാണ്ടറേഴ്സും (Wolves) തമ്മിൽ ഡിസംബർ 27-ന് ആൻഫീൽഡിൽ നടക്കാനിരിക്കുന്ന പോരാട്ടം ഫുട്ബോൾ ലോകത്തിന് ഏറെ വികാരനിർഭരമായ നിമിഷമാകും. കഴിഞ്ഞ ജൂലൈയിൽ സ്പെയിനിൽ വെച്ചുണ്ടായ കാറപകടത്തിൽ അന്തരിച്ച ലിവർപൂളിന്റെ പോർച്ചുഗീസ് സൂപ്പർ താരം ഡീഗോ ജോട്ടയുടെ മക്കളായ ഡിനിസും ദുവാർട്ടെയും ഈ മത്സരത്തിൽ മസ്കറ്റുകളായി ടീമിനെ മൈതാനത്തേക്ക് നയിക്കും.
ജോട്ടയുടെ മരണശേഷം അദ്ദേഹം പ്രതിനിധീകരിച്ചിരുന്ന രണ്ട് പ്രമുഖ ക്ലബ്ബുകൾ തമ്മിൽ ഏറ്റുമുട്ടുന്നു എന്ന പ്രത്യേകതയും ഈ മത്സരത്തിനുണ്ട്. ജോട്ടയോടുള്ള ആദരസൂചകമായി ലിവർപൂൾ ക്ലബ്ബ് അദ്ദേഹത്തിന്റെ 20-ാം നമ്പർ ജേഴ്സി എല്ലാ തലങ്ങളിലും പിൻവലിച്ചിരുന്നു.
ആൻഫീൽഡിൽ നടക്കുന്ന ഈ മത്സരത്തിൽ ജോട്ടയുടെ ഭാര്യ റൂട്ട് കാർഡോസോയും വിശിഷ്ടാതിഥിയായി പങ്കെടുക്കും. ലിവർപൂളിനായി പ്രീമിയർ ലീഗ് കിരീടം നേടുന്നതിൽ നിർണ്ണായക പങ്കുവഹിച്ച ജോട്ട, അതിനുമുൻപ് വോൾവ്സിനായും തകർപ്പൻ പ്രകടനം കാഴ്ചവെച്ചിരുന്നു.
