ബോൺമൗത്ത് താരം അന്റോയിൻ സെമെനിയോ ജനുവരിയിലെ ട്രാൻസ്ഫർ വിൻഡോയിൽ മാഞ്ചസ്റ്റർ സിറ്റിയിലേക്ക് മാറാൻ ആഗ്രഹം പ്രകടിപ്പിച്ചു. പെപ് ഗ്വാർഡിയോളയ്ക്ക് കീഴിൽ കിരീടങ്ങൾ നേടാനുള്ള താല്പര്യമാണ് സിറ്റിയെ തിരഞ്ഞെടുക്കാൻ 25-കാരനായ ഈ ഘാന താരത്തെ പ്രേരിപ്പിക്കുന്നത്.
അടുത്ത ആഴ്ച ട്രാൻസ്ഫർ വിൻഡോ തുറക്കാനിരിക്കുകയാണ്, നിലവിൽ ക്ലബ്ബുകൾ തമ്മിൽ ഔദ്യോഗിക കരാറുകളിൽ എത്തിയിട്ടില്ല. 2023-ൽ ബ്രിസ്റ്റോൾ സിറ്റിയിൽ നിന്നും 10 മില്യൺ പൗണ്ടിന് ബോൺമൗത്തിലെത്തിയ സെമെനിയോ, നിലവിലെ പ്രീമിയർ ലീഗ് സീസണിൽ 16 മത്സരങ്ങളിൽ നിന്ന് 8 ഗോളുകളും 3 അസിസ്റ്റുകളുമായി തകർപ്പൻ ഫോമിലാണ്.
ജനുവരിയിൽ മാത്രം പ്രാബല്യത്തിലുള്ള 65 മില്യൺ പൗണ്ടിന്റെ റിലീസ് ക്ലോസ് ഉപയോഗപ്പെടുത്തി താരത്തെ സ്വന്തമാക്കാനാണ് സിറ്റി ലക്ഷ്യമിടുന്നത്. മാഞ്ചസ്റ്റർ യുണൈറ്റഡ്, ലിവർപൂൾ, ടോട്ടനം തുടങ്ങിയ പ്രമുഖ ക്ലബ്ബുകൾ സെമെനിയോയ്ക്കായി രംഗത്തുണ്ടായിരുന്നുവെങ്കിലും താരം സിറ്റിയിലാണ് താല്പര്യം പ്രകടിപ്പിച്ചിരിക്കുന്നത്.
