മാഞ്ചസ്റ്റർ സിറ്റിയുടെ യുവ അർജന്റീനിയൻ താരം ക്ലോഡിയോ “എൽ ഡയാബ്ലിറ്റോ” എച്ചെവേരി ലോൺ വ്യവസ്ഥയിൽ സ്പാനിഷ് ക്ലബ്ബായ ജിറോണയിൽ ചേരുന്നു. 2026 ജൂൺ വരെ നീളുന്ന ഈ കരാർ പ്രകാരം താരത്തെ സ്ഥിരമായി വാങ്ങാനുള്ള നിബന്ധനകൾ (Buy option) ഉൾപ്പെടുത്തിയിട്ടില്ല. ജർമ്മൻ ക്ലബ്ബായ ബയർ ലെവർകൂസനിൽ ലോണിലായിരുന്ന 19-കാരനായ എച്ചെവേരിക്ക് അവിടെ മതിയായ അവസരങ്ങൾ ലഭിച്ചിരുന്നില്ല.
ഇതേത്തുടർന്നാണ് സിറ്റി ഫുട്ബോൾ ഗ്രൂപ്പിന് കീഴിലുള്ള ജിറോണയിലേക്ക് താരത്തെ മാറ്റാൻ മാഞ്ചസ്റ്റർ സിറ്റി തീരുമാനിച്ചത്. 2026 ലോകകപ്പിനുള്ള അർജന്റീന ടീമിൽ ഇടം പിടിക്കാൻ കൂടുതൽ മത്സരങ്ങൾ കളിക്കേണ്ടത് അനിവാര്യമാണെന്ന് തിരിച്ചറിഞ്ഞാണ് ഈ നീക്കം.
2024 ജനുവരിയിൽ റിവർ പ്ലേറ്റിൽ നിന്നും 12.5 മില്യൺ പൗണ്ടിന് സിറ്റി സ്വന്തമാക്കിയ ഈ പ്ലേമേക്കറെ ഭാവിയിലെ സൂപ്പർതാരമായാണ് ക്ലബ്ബ് വിലയിരുത്തുന്നത്. പ്രമുഖ ഫുട്ബോൾ ജേർണലിസ്റ്റ് ഫാബ്രിസിയോ റൊമാനോ ഈ ട്രാൻസ്ഫർ സ്ഥിരീകരിച്ചിട്ടുണ്ട്.
