വിശാഖപട്ടണത്ത് നടന്ന രണ്ടാം ടി20 മത്സരത്തിൽ ശ്രീലങ്കയെ ഏഴ് വിക്കറ്റിന് പരാജയപ്പെടുത്തി ഇന്ത്യ അഞ്ച് മത്സരങ്ങളുടെ പരമ്പരയിൽ 2-0ത്തിന് മുന്നിലെത്തി. ഓപ്പണർ ഷഫാലി വർമ്മയുടെ തകർപ്പൻ ബാറ്റിംഗാണ് ഇന്ത്യക്ക് അനായാസ വിജയം സമ്മാനിച്ചത്. വെറും 34 പന്തിൽ നിന്ന് 11 ഫോറുകളും ഒരു സിക്സറുമടക്കം 69 റൺസെടുത്ത് ഷഫാലി പുറത്താകാതെ നിന്നു.
ശ്രീലങ്ക ഉയർത്തിയ 129 റൺസ് വിജയലക്ഷ്യം വെറും 11.5 ഓവറിൽ മൂന്ന് വിക്കറ്റ് നഷ്ടത്തിൽ ഇന്ത്യ മറികടന്നു. പത്ത് ഓവറിൽ 113 റൺസ് അടിച്ചുകൂട്ടിയ ഇന്ത്യ, വനിതാ ടി20 ചരിത്രത്തിൽ ആദ്യ പത്ത് ഓവറിലെ ഏറ്റവും ഉയർന്ന സ്കോർ എന്ന റെക്കോർഡും സ്വന്തമാക്കി. സ്മൃതി മന്ദാന (14), ജെമീമ റോഡ്രിഗസ് (26) എന്നിവർ ഷഫാലിക്ക് മികച്ച പിന്തുണ നൽകി.
ക്യാപ്റ്റൻ ഹർമൻപ്രീത് കൗർ 10 റൺസെടുത്ത് പുറത്തായെങ്കിലും, ഈ വിജയത്തോടെ ഏറ്റവും കൂടുതൽ ടി20 വിജയങ്ങൾ നേടിയ ക്യാപ്റ്റൻ എന്ന മെഗ് ലാനിംഗിന്റെ റെക്കോർഡിനൊപ്പം (76 വിജയങ്ങൾ) താരം എത്തി.
നേരത്തെ ടോസ് നേടി ബാറ്റിംഗിനിറങ്ങിയ ശ്രീലങ്കയെ ഇന്ത്യൻ ബൗളർമാർ 128 റൺസിൽ ഒതുക്കിയിരുന്നു. 31 റൺസെടുത്ത ക്യാപ്റ്റൻ ചമാരി അത്തപ്പത്തുവും 33 റൺസെടുത്ത ഹർഷിത സമരവിക്രമയും മാത്രമാണ് ലങ്കൻ നിരയിൽ പൊരുതിയത്. പനി ബാധിച്ച ദീപ്തി ശർമ്മയ്ക്ക് പകരം ടീമിലെത്തിയ സ്നേഹ് റാണ നാല് ഓവറിൽ 11 റൺസ് മാത്രം വഴങ്ങി ഒരു വിക്കറ്റ് വീഴ്ത്തി മികച്ച പ്രകടനം നടത്തി.
