സിംബാബ്വെ ക്രിക്കറ്റിൽ പുതിയ നേതൃമാറ്റം പ്രഖ്യാപിച്ചു. ഇടംകൈയ്യൻ ഫാസ്റ്റ് ബൗളർ റിച്ചാർഡ് നഗരാവയെ സിംബാബ്വെയുടെ പുതിയ ടെസ്റ്റ്, ഏകദിന നായകനായി നിയമിച്ചു. 22-കാരനായ യുവ ഓൾറൗണ്ടർ ബ്രയാൻ ബെന്നറ്റാണ് വൈസ് ക്യാപ്റ്റൻ. ഹരാരെയിൽ നടന്ന സിംബാബ്വെ ക്രിക്കറ്റ് ബോർഡിന്റെ നാലാം പാദ യോഗത്തിലാണ് ഈ തീരുമാനമെടുത്തത്.
മുതിർന്ന താരം ക്രേഗ് ഇർവിൻ സ്ഥാനമൊഴിഞ്ഞതിനെത്തുടർന്നാണ് 27-കാരനായ നഗരാവയെ നായകസ്ഥാനത്തേക്ക് തിരഞ്ഞെടുത്തത്. അതേസമയം, സിക്കന്ദർ റാസ ടി20 നായകനായി തുടരും. ഇതോടെ വ്യത്യസ്ത ഫോർമാറ്റുകൾക്ക് വ്യത്യസ്ത നായകൻമാർ എന്ന രീതിയിലേക്ക് സിംബാബ്വെ ക്രിക്കറ്റ് മാറിയിരിക്കുകയാണ്.
2017-ൽ അന്താരാഷ്ട്ര ക്രിക്കറ്റിൽ അരങ്ങേറ്റം കുറിച്ച നഗരാവ, സിംബാബ്വെയ്ക്കായി ടി20യിൽ 100 വിക്കറ്റ് തികയ്ക്കുന്ന ആദ്യ താരമാണ്. 11 ടെസ്റ്റുകളിലും 140-ലധികം വൈറ്റ് ബോൾ മത്സരങ്ങളിലും അദ്ദേഹം രാജ്യത്തെ പ്രതിനിധീകരിച്ചിട്ടുണ്ട്.
