എല്ലാൻഡ് റോഡിൽ നടന്ന പ്രീമിയർ ലീഗ് മത്സരത്തിൽ ലീഡ്സ് യുണൈറ്റഡും ലിവർപൂളും 3-3 എന്ന ആവേശകരമായ സമനിലയിൽ പിരിഞ്ഞു. ആർനെ സ്ലോട്ടിന്റെ ലിവർപൂൾ ടീമിന്, രണ്ട് ഗോളിന്റെ ലീഡ് പാഴാക്കിയതിനാൽ വീണ്ടും നിരാശാജനകമായ ഒരു ഫലമാണ് ഈ നാടകീയ മത്സരം നൽകിയത്.
ഇരുടീമുകളുടെയും നിരവധി ശ്രമങ്ങൾ ലക്ഷ്യം കാണാതെ പോയതോടെ ആദ്യ പകുതി ഗോൾ രഹിതമായി അവസാനിച്ചു. 61 ശതമാനത്തിലധികം പൊസഷൻ ലിവർപൂളിന് അനുകൂലമായിരുന്നെങ്കിലും, അവർക്ക് ഗോൾ കണ്ടെത്താൻ ആയില്ല.
ലിവർപൂളിനായി ഹ്യൂഗോ എകിറ്റികെ 48-ാം മിനിറ്റിൽ കൃത്യമായ പാസ് സ്വീകരിച്ച് ബോക്സിനുള്ളിൽ നിന്ന് തകർപ്പൻ ഫിനിഷിലൂടെ ആദ്യ ഗോൾ നേടി, സീസണിലെ താരത്തിന്റെ നാലാം ഗോളായിരുന്നു ഇത്. രണ്ട് മിനിറ്റിന് ശേഷം, 50-ാം മിനിറ്റിൽ കോനർ ബ്രാഡ്ലിയുടെ സഹായത്തോടെ എകിറ്റികെ വീണ്ടും ഒരു മികച്ച സ്ട്രൈക്കിലൂടെ അഞ്ചാം ഗോളും നേടി, വാർ പരിശോധനക്ക് ശേഷം ഗോൾ ഉറപ്പിച്ചതോടെ റെഡ്സ് 2-0-ന് മുന്നിലായി.
17-ാം സ്ഥാനത്തായിരുന്ന ലീഡ്സ്, ചെൽസിക്കെതിരായ വിജയത്തിന്റെ ആത്മവിശ്വാസം നിലനിർത്താൻ ശ്രമിച്ചു. 73-ാം മിനിറ്റിൽ ഇബ്രാഹിമ കൊണാറ്റെ വിൽഫ്രഡ് ഗോണ്ടോയെ ഫൗൾ ചെയ്തതിന് വാർ പരിശോധനയിൽ പെനാൽറ്റി ലഭിച്ചു. ഡോമിനിക് കാൽവർട്ട്-ലൂയിൻ സീസണിലെ തന്റെ നാലാം ഗോൾ വലയുടെ വലത് മുകൾ മൂലയിലേക്ക് അനായാസം എത്തിച്ച് ലീഡ് 2-1 ആക്കി കുറച്ചു, ഇത് ഹോം കാണികളെ ആവേശത്തിലാക്കി.
തൊട്ടടുത്ത മിനിറ്റിൽ 75-ാം മിനിറ്റിൽ, ബ്രെൻഡൻ ആരൺസന്റെ മികച്ച അസിസ്റ്റിൽ ആന്റൺ സ്റ്റാച്ച് ബോക്സിന്റെ മധ്യഭാഗത്ത് നിന്ന് വലത് കാൽ ഷോട്ട് വലയിലെത്തിച്ച് 2-2 എന്ന നിലയിൽ സമനിലയിലാക്കി, താരത്തിന്റെ സീസണിലെ രണ്ടാം ഗോളായിരുന്നു ഇത്.
80-ാം മിനിറ്റിൽ റയാൻ ഗ്രേവൻബെർച്ചിന്റെ അസിസ്റ്റിൽ ഡൊമിനിക് സൊബോസ്ലായ് താഴ്ന്ന ഒരു ഷോട്ട് അടിച്ച് വലയുടെ ഇടത് മൂലയിൽ എത്തിച്ചതോടെ ലിവർപൂൾ വീണ്ടും 3-2 എന്ന നിലയിൽ മുന്നിലെത്തി.
എന്നിട്ടും ലീഡ തളർന്നില്ല. 11 മിനിറ്റ് നീണ്ട ഇഞ്ചുറി ടൈമിന്റെ അവസാന നിമിഷം, 90+6-ാം മിനിറ്റിൽ, തനക ബോക്സിനുള്ളിൽ നിന്ന് ഒരു ഷോട്ട് അടിച്ച് സീസണിലെ തന്റെ രണ്ടാമത്തെ ഗോൾ നേടി ലീഡ്സിനെ 3-3 എന്ന നിലയിൽ സമനിലയിലെത്തിച്ചു, എല്ലാൻഡ് റോഡിനെ ആവേശത്തിലാഴ്ത്തി.
ഈ സമനില ലിവർപൂളിന്റെ സ്ഥിരതയില്ലാത്ത കാമ്പെയ്നിന്റെ തുടർച്ചയാണ്.
