മാഞ്ചസ്റ്റർ സിറ്റിയുടെ യുവതാരം നിക്കോ ഓ റെയ്‌ലി ഇംഗ്ലണ്ട് സീനിയർ ദേശീയ ടീമിൽ ആദ്യമായി ഇടം നേടി. ചെൽസിയുടെ റീസ് ജെയിംസ് പരിക്കേറ്റ് പിന്മാറിയതിനെ തുടർന്നാണ് 20-കാരനായ ഓ റെയ്‌ലിയെ ടീമിൽ ഉൾപ്പെടുത്തിയത്. ഇംഗ്ലണ്ടിന്റെ പ്രധാന റൈറ്റ്-ബാക്കായിരുന്ന ജെയിംസിന് ലിവർപൂളുമായുള്ള മത്സരത്തിനിടെയാണ് പരിക്കേറ്റത്. ഇതോടെ വരാനിരിക്കുന്ന വെയിൽസിനും ലാറ്റ്‌വിയക്കുമെതിരായ അന്താരാഷ്ട്ര മത്സരങ്ങളിൽ നിന്ന് അദ്ദേഹത്തിന് വിട്ടുനിൽക്കേണ്ടി വന്നു.
മാഞ്ചസ്റ്റർ സിറ്റിക്ക് വേണ്ടി മികച്ച പ്രകടനം കാഴ്ചവെച്ച ഓ റെയ്‌ലിക്ക് ഇത് സീനിയർ തലത്തിലെ ആദ്യ ദേശീയ ടീം വിളിയാണ്. സിറ്റിയുടെ കഴിഞ്ഞ ഏഴ് മത്സരങ്ങളിൽ താരം സ്ഥിരം സ്റ്റാർട്ടറായിരുന്നു. നേരത്തെ അണ്ടർ-21 ടീമിൽ ഇടം നേടിയിരുന്ന ഓ റെയ്‌ലിയെയാണ് ഇപ്പോൾ സീനിയർ ടീമിലേക്ക് സ്ഥാനക്കയറ്റം നൽകി ഉൾപ്പെടുത്തിയിരിക്കുന്നത്.
വ്യാഴാഴ്ച വെയിൽസുമായി സൗഹൃദ മത്സരവും ഒക്ടോബർ 14-ന് ലാറ്റ്‌വിയയിൽ വെച്ച് ലോകകപ്പ് യോഗ്യതാ മത്സരവുമാണ് ഇംഗ്ലണ്ടിന് ഇനി കളിക്കാനുള്ളത്.
