247-ാമത് മെർസിസൈഡ് ഡെർബിയിൽ ലിവർപൂളിന് വിജയം. ആൻഫീൽഡിൽ നടന്ന ആവേശകരമായ മത്സരത്തിൽ ഒന്നിനെതിരെ രണ്ട് ഗോളുകൾക്ക് ലിവർപൂൾ എവർട്ടണെ പരാജയപ്പെടുത്തി. റയാൻ ഗ്രാവൻബെർച്ചും ഹ്യൂഗോ എക്കിറ്റികെയും ലിവർപൂളിനായി വലകുലുക്കിയപ്പോൾ ഇദ്രിസ്സ ഗേയ എവർട്ടണിന്റെ ആശ്വാസ ഗോൾ നേടി.
മത്സരത്തിന്റെ തുടക്കം മുതൽ ലിവർപൂൾ ആക്രമിച്ചു കളിച്ചു. പത്താം മിനിറ്റിൽ തന്നെ അവർ ലീഡ് നേടി. മുഹമ്മദ് സല നൽകിയ മികച്ചൊരു ക്രോസ് ഗ്രാവൻബെർച്ച് കൃത്യമായി വലയിലെത്തിച്ചു. എവർട്ടൺ ഗോൾകീപ്പർ ജോർദാൻ പിക്ക്ഫോർഡിന് ഒന്നും ചെയ്യാനുണ്ടായിരുന്നില്ല.
29-ാം മിനിറ്റിൽ ലിവർപൂൾ തങ്ങളുടെ ലീഡ് രണ്ടാക്കി ഉയർത്തി. ഗ്രാവൻബെർച്ചിന്റെ പാസിൽ നിന്ന് ഹ്യൂഗോ എക്കിറ്റികെ തകർപ്പൻ ഷോട്ടിലൂടെ ഗോൾ നേടി. ഇതോടെ ലിവർപൂൾ 2-0 എന്ന നിലയിൽ മുന്നിലെത്തി. എവർട്ടൺ ചില നീക്കങ്ങൾ നടത്തിയെങ്കിലും ആദ്യ പകുതിയിൽ ഗോൾ നേടാൻ കഴിഞ്ഞില്ല.
രണ്ടാം പകുതിയിൽ എവർട്ടൺ പരിശീലകൻ ഡേവിഡ് മോയസ് തന്ത്രപരമായ മാറ്റങ്ങൾ വരുത്തി. 58-ാം മിനിറ്റിൽ അവർ ഒരു ഗോൾ മടക്കി. ജാക്ക് ഗ്രീലിഷിന്റെ ക്രോസിൽ നിന്ന് ഇദ്രിസ്സ ഗേയ അലിസനെ മറികടന്ന് മനോഹരമായൊരു ഗോൾ നേടി. ഇതോടെ സ്കോർ 2-1 ആയി.
തുടർന്ന് ഇരു ടീമുകളും ആക്രമിച്ചു കളിച്ചു. സമനില ഗോളിനായി എവർട്ടൺ ശ്രമിച്ചെങ്കിലും ലിവർപൂൾ പ്രതിരോധം ശക്തമായി നിന്നു. എവർട്ടണിനെതിരെ ഹോം ഗ്രൗണ്ടിൽ ലിവർപൂളിന്റെ തുടർച്ചയായ അഞ്ചാം വിജയമാണിത്.
