ഓഗസ്റ്റ് 2025-ലെ ഐസിസി മെൻസ് പ്ലെയർ ഓഫ് ദ മന്ത് ആയി ഇന്ത്യൻ പേസ് ബൗളർ മുഹമ്മദ് സിറാജിനെ തിരഞ്ഞെടുത്തു. ഓവലിൽ നടന്ന ആൻഡേഴ്സൺ-ടെൻഡുൽക്കർ ട്രോഫിയിലെ അവസാന ടെസ്റ്റ് മത്സരത്തിലെ അദ്ദേഹത്തിൻ്റെ മികച്ച പ്രകടനമാണ് ഈ നേട്ടത്തിന് അർഹനാക്കിയത്. ഇരു ഇന്നിങ്സുകളിലുമായി ഒമ്പത് വിക്കറ്റുകളാണ് സിറാജ് നേടിയത്.
ഇതിൽ രണ്ടാം ഇന്നിങ്സിലെ നിർണ്ണായകമായ അഞ്ച് വിക്കറ്റ് നേട്ടം ഇന്ത്യക്ക് അവിസ്മരണീയമായ വിജയം നേടിക്കൊടുക്കുകയും പരമ്പര 2-2 എന്ന നിലയിൽ സമനിലയിൽ അവസാനിക്കാൻ സഹായിക്കുകയും ചെയ്തു.
പരമ്പരയിലെ അഞ്ച് ടെസ്റ്റുകളിലും കളിച്ച സിറാജ് ഇന്ത്യക്ക് വേണ്ടി ഏറ്റവും കൂടുതൽ വിക്കറ്റുകൾ നേടിയ ബൗളറായിരുന്നു. 23 വിക്കറ്റുകളാണ് അദ്ദേഹം നേടിയത്. ഈ പുരസ്കാരത്തിനായി ന്യൂസിലൻഡിന്റെ മാറ്റ് ഹെൻറിയെയും വെസ്റ്റ് ഇൻഡീസിന്റെ ജെയ്ഡൻ സീൽസിനെയും പിന്തള്ളിയാണ് സിറാജ് ഈ നേട്ടം സ്വന്തമാക്കിയത്.
