ഓൾഡ് ട്രാഫോർഡിൽ നടന്ന ആവേശകരമായ പ്രീമിയർ ലീഗ് മത്സരത്തിൽ ബേൺലിയെ 3-2ന് പരാജയപ്പെടുത്തി മാഞ്ചസ്റ്റർ യുണൈറ്റഡ് നാടകീയ വിജയം സ്വന്തമാക്കി. മത്സരത്തിന്റെ അവസാന നിമിഷങ്ങളിൽ ബ്രൂണോ ഫെർണാണ്ടസ് നേടിയ പെനാൽറ്റി ഗോളാണ് വിജയത്തിന് കാരണമായത്.
മത്സരത്തിൻ്റെ 27-ാം മിനിറ്റിൽ ബേൺലി താരം ജോഷ് കുള്ളൻ്റെ അപ്രതീക്ഷിത ഓൺ ഗോളിലൂടെയാണ് യുണൈറ്റഡ് മുന്നിലെത്തിയത്. മാഞ്ചസ്റ്റർ യുണൈറ്റഡിൻ്റെ മേസൺ മൗണ്ട് നൽകിയ ക്രോസിൽ നിന്ന് കസെമിറോ ഹെഡ്ഡ് ചെയ്ത പന്ത് ക്രോസ്ബാറിൽ തട്ടി തിരിച്ചുവന്നത് കുള്ളൻ്റെ ശരീരത്തിൽ തട്ടി വലയിലായി.
55-ാം മിനിറ്റിൽ ലയൽ ഫോസ്റ്റർ നേടിയ ഗോളിൽ ബേൺലി ഒപ്പമെത്തി. 57-ാം മിനിറ്റിൽ ഡിയോഗോ ഡാലോട്ടിന്റെ പാസിൽ നിന്ന് ബ്രയാൻ എംബ്യൂമോ ഒരു ഗോൾ നേടി യുണൈറ്റഡിന് വീണ്ടും ലീഡ് നൽകി. പക്ഷെ വീണ്ടും ലീഡ് നിലനിർത്താൻ യുണൈറ്റഡിനായില്ല. 66-ാം മിനിറ്റിൽ ജെയ്ഡൺ ആന്റണി നേടിയ ഗോളിൽ ബേൺലി വീണ്ടും സമനില പിടിച്ചു.
മത്സരത്തിൻ്റെ അവസാന നിമിഷങ്ങളിലാണ് നാടകീയത അരങ്ങേറിയത്. ബോക്സിൽ വെച്ച് ജെയ്ഡൺ ആന്റണി അമദിന്റെ ഷർട്ടിൽ പിടിച്ച് വലിച്ചത് വാർ പരിശോധനയിൽ പെനാൽറ്റിക്ക് കാരണമായി. 97-ാം മിനിറ്റിൽ ബ്രൂണോ ഫെർണാണ്ടസ് ആ പെനാൽറ്റി ലക്ഷ്യത്തിലെത്തിച്ച് യുണൈറ്റഡിന് അവിസ്മരണീയ വിജയം സമ്മാനിച്ചു. സീസണിലെ യുണൈറ്റഡിന്റെ ആദ്യ ജയമാണിത്.
