ചേസ് സ്റ്റേഡിയത്തിൽ നടന്ന ആവേശകരമായ ലീഗ്സ് കപ്പ് ക്വാർട്ടർ ഫൈനലിൽ ടിഗ്രെസ് യുഎഎൻഎലിനെ 2-1ന് തോൽപ്പിച്ച് ഇന്റർ മയാമി സെമിഫൈനലിൽ പ്രവേശിച്ചു. രണ്ട് പെനാൽറ്റി ഗോളുകളുമായി ലൂയിസ് സുവാരസാണ് മയാമിയുടെ വിജയശില്പി.
മത്സരത്തിന്റെ 23-ാം മിനിറ്റിൽ ലഭിച്ച ആദ്യ പെനാൽറ്റിയിലൂടെ സുവാരസ് മയാമിയെ മുന്നിലെത്തിച്ചു. തുടർന്ന് 67-ാം മിനിറ്റിൽ ടിഗ്രെസിനായി ഏഞ്ചൽ കൊറിയ ഒരു ഗോൾ നേടി, ഇതോടെ സ്കോർ സമനിലയിലായി.
കളി അവസാനിക്കാൻ മിനിറ്റുകൾ മാത്രം ശേഷിക്കെ, 86-ാം മിനിറ്റിൽ ലഭിച്ച പെനാൽറ്റി മയാമിയുടെ വിജയമുറപ്പിച്ചു. സുവാരസ് അനായാസം തന്റെ രണ്ടാമത്തെ ഗോളും നേടി. ലയണൽ മെസി ഇല്ലാതിരുന്നിട്ടും മികച്ച പ്രകടനം കാഴ്ചവെച്ചാണ് മയാമി സെമി ഫൈനൽ ഉറപ്പിച്ചത്.
