ലണ്ടൻ: മുൻ ടോട്ടനം, ഇംഗ്ലണ്ട് താരം ഡെലെ അലി തന്റെ 29-ാം വയസ്സിൽ ഫുട്ബോളിൽ നിന്ന് വിരമിക്കുന്നതിനെക്കുറിച്ച് ഗൗരവമായി ആലോചിക്കുന്നു. വരാനിരിക്കുന്ന സീരി എ സീസണിലേക്കുള്ള കോമോയുടെ ടീമിൽ നിന്ന് പുറത്തായതാണ് ഈ തീരുമാനത്തിന് പിന്നിൽ. തന്റെ കരിയർ തിരികെ കൊണ്ടുവരാൻ 2025 ജനുവരിയിൽ 18 മാസത്തെ കരാറിൽ കോമോയിലേക്ക് മാറിയ അല്ലിക്ക് ഇപ്പോൾ ഒറ്റയ്ക്ക് പരിശീലനം നടത്തേണ്ട അവസ്ഥയാണ്.
ക്ലബ്ബിന്റെ ഭാവി പദ്ധതികളിൽ അലി ഇല്ലെന്ന് മാനേജർ സെസ്ക് ഫാബ്രിഗസ് അറിയിച്ചതോടെയാണ് ഈ സ്ഥിതി വിശേഷം. കോമോക്ക് വേണ്ടിയുള്ള അരങ്ങേറ്റ മത്സരത്തിൽ വെറും 10 മിനിറ്റിനുള്ളിൽ ചുവപ്പ് കാർഡ് കണ്ട് പുറത്തായ അല്ലിയുടെ പ്രകടനം വളരെ നിരാശാജനകമായിരുന്നു. പരിക്കുകളും മോശം ഫോമും കാരണം ഒരുപാട് നാളുകൾക്ക് ശേഷമാണ് അലി ഫസ്റ്റ് ടീം ഫുട്ബോളിലേക്ക് മടങ്ങിയെത്തിയത്.
യൂറോപ്പിലെ ഏറ്റവും മികച്ച യുവപ്രതിഭകളിൽ ഒരാളായി ഒരിക്കൽ വാഴ്ത്തപ്പെട്ട താരമാണ് ഡെലെ അലി. ചാമ്പ്യൻസ് ലീഗ് ഫൈനലിൽ കളിച്ചതും ടോട്ടനത്തിനുവേണ്ടി 50 പ്രീമിയർ ലീഗ് ഗോളുകൾ നേടിയതുമടക്കം കരിയറിൽ മികച്ച നേട്ടങ്ങൾ സ്വന്തമാക്കിയിട്ടുണ്ട്. എന്നാൽ, പിന്നീട് പരിക്കും ആത്മവിശ്വാസക്കുറവും അദ്ദേഹത്തെ തളർത്തി. കോമോയിലൂടെ തിരിച്ചുവന്ന് ഇംഗ്ലണ്ട് ടീമിലേക്ക് തിരികെ വരാൻ ആഗ്രഹിച്ചെങ്കിലും, അദ്ദേഹത്തിന് പ്രീസീസണിൽ അവസരം ലഭിച്ചില്ല. ഇത് വിരമിക്കുന്നതിനെക്കുറിച്ച് ചിന്തിക്കാൻ അല്ലിയെ പ്രേരിപ്പിച്ചു. മറ്റൊരു ക്ലബ്ബിലേക്ക് മാറുന്നതിനേക്കാൾ തന്റെ മാനസികാരോഗ്യത്തിനും സന്തോഷത്തിനും മുൻഗണന നൽകാനാണ് അലി ആഗ്രഹിക്കുന്നതെന്നും ഉടൻ തന്നെ ഒരു അന്തിമ തീരുമാനം ഉണ്ടാകുമെന്നും താരത്തോട് അടുത്ത വൃത്തങ്ങൾ പറയുന്നു.
