കഴിഞ്ഞ മാസം സ്പെയിനിൽ കാറപകടത്തിൽ മരണപ്പെട്ട മുൻ ലിവർപൂൾ ടീംമേറ്റ് ഡീഗോ ജോട്ടയോടുള്ള ആദരസൂചകമായി, ഈ സീസണിൽ 20-ാം നമ്പർ ജഴ്സി അണിയുമെന്ന് പ്രഖ്യാപിച്ചിരിക്കുകയാണ് മിൽനർ.
ജൂലൈ ആദ്യവാരം സ്പെയിനിന്റെ വടക്ക്-പടിഞ്ഞാറൻ ഭാഗത്ത് വെച്ചുണ്ടായ കാറപകടത്തിലാണ് ജോട്ടയ്ക്കും സഹോദരൻ ആന്ദ്രെ സിൽവയ്ക്കും ജീവൻ നഷ്ടമായത്. ഇരുവരും സഞ്ചരിച്ചിരുന്ന ലംബോർഗിനി റോഡിൽ നിന്ന് തെന്നിമാറി തീപിടിക്കുകയായിരുന്നു.
ലിവർപൂളിൽ മിൽനറിനൊപ്പം മൂന്ന് സീസൺ കളിച്ച പോർച്ചുഗീസ് ഫോർവേഡ്, 20-ാം നമ്പർ ജഴ്സിയാണ് അണിഞ്ഞിരുന്നത്.
“കാർലോസ് (ബലേബ) തന്റെ നമ്പർ മാറ്റാൻ ആഗ്രഹിക്കുന്നുണ്ടെന്നും 20-ാം നമ്പർ ഒഴിവുണ്ടെന്നും അറിഞ്ഞപ്പോൾ, ജോട്ടയോടുള്ള ആദരസൂചകമായി ആ നമ്പർ ഏറ്റെടുക്കാൻ ഞാൻ ആഗ്രഹിച്ചു,” മിൽനർ പറഞ്ഞു.
“അത്ഭുതപ്പെടുത്തുന്ന ഒരു കളിക്കാരനായിരുന്നു ജോട്ട. ഒപ്പം കളിക്കാൻ എനിക്ക് ഭാഗ്യമുണ്ടായി. ഒരു നല്ല സുഹൃത്ത് കൂടിയായിരുന്നു അവൻ. അതുകൊണ്ട് പ്രീമിയർ ലീഗിൽ അവന്റെ നമ്പർ ധരിക്കുന്നത് വലിയൊരു ബഹുമതിയാണ്,” മിൽനർ കൂട്ടിച്ചേർത്തു.
ജോട്ടയുടെ ഭാര്യ റൂട്ടെയും കുടുംബവുമായി നടത്തിയ ചർച്ചകൾക്ക് ശേഷം, ലിവർപൂൾ 20-ാം നമ്പർ ജഴ്സി എന്നെന്നേക്കുമായി ഒഴിവാക്കാൻ തീരുമാനിച്ചു. വനിതാ ടീമുകളിലും അക്കാദമി ടീമുകളിലും ഉൾപ്പെടെ, ക്ലബ്ബിന്റെ ഒരു തലത്തിലും ഇനി ഈ നമ്പർ ഉപയോഗിക്കില്ല.
39-കാരനായ മിൽനർ അടുത്തിടെയാണ് ബ്രൈറ്റണുമായി ഒരു വർഷത്തെ കരാർ ഒപ്പിട്ടത്. ഇതിനകം 638 പ്രീമിയർ ലീഗ് മത്സരങ്ങളിൽ കളിച്ച അദ്ദേഹം, ഗാരെത് ബാരിയുടെ 653 എന്ന റെക്കോർഡ് മറികടക്കാൻ ഒരുങ്ങുകയാണ്.
