ഇന്ത്യയും പാകിസ്താനും തമ്മിലുള്ള വേൾഡ് ചാമ്പ്യൻഷിപ്പ് ഓഫ് ലെജൻഡ്സ് (WCL) 2025 മത്സരം ഉപേക്ഷിച്ചു. ഭൂരിഭാഗം ഇന്ത്യൻ താരങ്ങളും മത്സരത്തിൽ പങ്കെടുക്കാൻ വിസമ്മതിച്ചതിനെ തുടർന്നാണ് ഈ തീരുമാനം. ജൂലൈ 20ന് ബിർമിംഗ്ഹാമിലാണ് മത്സരം നടക്കാനിരുന്നത്.
പഹൽഗാം ഭീകരാക്രമണത്തിന് ശേഷം ഇരു രാജ്യങ്ങളും തമ്മിലുള്ള ബന്ധം കൂടുതൽ വഷളായിരുന്നു. ഈ പശ്ചാത്തലത്തിൽ പാകിസ്താനുമായി കളിക്കാൻ തങ്ങൾക്ക് താല്പര്യമില്ലെന്ന് ഇന്ത്യൻ താരങ്ങൾ അറിയിച്ചു. വോളീബോൾ മത്സരം, പാകിസ്താൻ ഹോക്കി ടീമിന്റെ ഇന്ത്യൻ പര്യടനം തുടങ്ങിയ ചില കായിക മത്സരങ്ങൾ നടക്കുന്നുണ്ടെങ്കിലും, ക്രിക്കറ്റ് താരങ്ങൾക്കിടയിൽ എതിർപ്പ് ശക്തമായിരുന്നു.
മത്സരം ഉപേക്ഷിച്ചതിൽ ഖേദം പ്രകടിപ്പിച്ച് WCL സംഘാടകർ ഔദ്യോഗിക പ്രസ്താവന പുറത്തിറക്കി. ആരാധകർക്ക് സന്തോഷം നൽകുക എന്ന ലക്ഷ്യത്തോടെയാണ് മത്സരം ഒരുക്കിയതെന്നും, എന്നാൽ അത് കളിക്കാർക്കും ആരാധകർക്കും ഇടയിൽ അസ്വസ്ഥതയുണ്ടാക്കിയെന്നും അവർ വ്യക്തമാക്കി.
