ബോർഡ് ഓഫ് കൺട്രോൾ ഫോർ ക്രിക്കറ്റ് ഇൻ ഇന്ത്യ (ബിസിസിഐ) 2023-24 സാമ്പത്തിക വർഷത്തിൽ ₹9,741.7 കോടി രൂപയുടെ മൊത്തം വരുമാനം രേഖപ്പെടുത്തി. ഇതിൽ ₹5,761 കോടിയും ഇന്ത്യൻ പ്രീമിയർ ലീഗിൽ (ഐപിഎൽ) നിന്നാണ് ലഭിച്ചത്. അതായത്, ബിസിസിഐയുടെ വാർഷിക വരുമാനത്തിന്റെ ഏകദേശം 59 ശതമാനവും ഐപിഎല്ലിൽ നിന്നാണ്.
ഐപിഎൽ വരുമാനത്തിന് പുറമെ, അന്താരാഷ്ട്ര മത്സരങ്ങളുടെ സംപ്രേക്ഷണാവകാശം ഉൾപ്പെടെ നോൺ-ഐപിഎൽ മീഡിയ അവകാശങ്ങളിലൂടെ ₹361 കോടി രൂപ ബിസിസിഐ നേടി. രഞ്ജി ട്രോഫി, ദിലീപ് ട്രോഫി, സി.കെ. നായിഡു ട്രോഫി തുടങ്ങിയ ആഭ്യന്തര ടൂർണമെന്റുകൾക്ക് ഇന്ത്യൻ ക്രിക്കറ്റിൽ വലിയ പാരമ്പര്യമുണ്ടെങ്കിലും, വേണ്ടത്ര വരുമാനം ഈ ആഭ്യന്തര ടൂർണമെന്റുകളിൽ നിന്ന് വരുന്നില്ല.
ബോർഡിന് ഏകദേശം ₹30,000 കോടി രൂപ കരുതൽ ധനമായി ഉണ്ടെന്നും, ഇത് പ്രതിവർഷം ₹1,000 കോടി പലിശയിനത്തിൽ നേടിത്തരുന്നുണ്ടെന്നും റിപ്പോർട്ടുണ്ട്. സ്പോൺസർഷിപ്പുകൾ, ബ്രോഡ്കാസ്റ്റ് കരാറുകൾ, മാച്ച് ഡേ വരുമാനം എന്നിവയിലെ വർദ്ധനവ് കാരണം ബിസിസിഐയുടെ വരുമാനം സുസ്ഥിരമാണെന്നും പ്രതിവർഷം 10 മുതൽ 12 ശതമാനം വരെ വർദ്ധിക്കുമെന്നും ബിസിനസ്സ് വിദഗ്ദ്ധർ വിശ്വസിക്കുന്നു.
