സൗദി പ്രോ ലീഗ് വമ്പൻമാരായ അൽ ഹിലാൽ, വിക്ടർ ഓസിമെൻ്റെ 75 മില്യൺ യൂറോയുടെ റിലീസ് ക്ലോസ് സജീവമാക്കാൻ നാപോളിയുമായി പൂർണ്ണ ധാരണയിലെത്തിയതായി റിപ്പോർട്ട്.
2024-25 സീസണിൽ ഗലാറ്റസറേയിൽ ലോണിൽ കളിച്ച നൈജീരിയൻ സ്ട്രൈക്കർ, ഇപ്പോൾ സൗദി അറേബ്യയിലേക്കുള്ള ഒരു വലിയ മാറ്റത്തിന് അടുത്തിരിക്കുകയാണ്.
75 മില്യൺ യൂറോയായി കുറച്ച പുതിയ റിലീസ് ക്ലോസിന് താഴെ ഒരു ചർച്ചയ്ക്കും നാപോളി തയ്യാറായിരുന്നില്ല. മാഞ്ചസ്റ്റർ യുണൈറ്റഡ്, ആഴ്സണൽ, ചെൽസി തുടങ്ങിയ പ്രീമിയർ ലീഗ് ക്ലബ്ബുകളിൽ നിന്നുള്ള താൽപ്പര്യം കുറഞ്ഞതോടെ, അൽ ഹിലാലുമായി തന്നെ നാപോളി കരാറിൽ എത്തുക ആയിരുന്നു.
ഓസിമെൻ്റെ കരാറിൽ അൽ ഹിലാൽ സീസണിൽ 30-40 മില്യൺ യൂറോയുടെ ശമ്പളം വാഗ്ദാനം ചെയ്യുന്നു, ബോണസുകൾ ഉൾപ്പെടെ ഇത് 45 മില്യൺ യൂറോ വരെ ഉയരാൻ സാധ്യതയുണ്ട്. പ്രീമിയർ ലീഗ് നീക്കത്തിനായി പ്രതീക്ഷയർപ്പിച്ചിരുന്ന ഓസിമെനെ ഈ വേതനം ആണ് സ്വാധീനിച്ചതെന്നാണ് കരുതപ്പെടുന്നത്.
