മൗറീസിയോ സാരി ലാസിയോയിലേക്ക് ഔദ്യോഗികമായി തിരിച്ചെത്തി. റോമൻ ക്ലബ്ബിലേക്കുള്ള അദ്ദേഹത്തിൻ്റെ രണ്ടാം വരവാണിത്. യൂറോപ്യൻ യോഗ്യത നേടാൻ കഴിയാതെ വന്നതിനെ തുടർന്ന് കഴിഞ്ഞയാഴ്ച സ്ഥാനമൊഴിഞ്ഞ മാർക്കോ ബറോണിക്ക് പകരമാണ് 66 കാരനായ ഇറ്റാലിയൻ പരിശീലകൻ എത്തുന്നത് എന്ന് ക്ലബ്ബ് തിങ്കളാഴ്ച അറിയിച്ചു.
സാരി ആദ്യമായി 2021 ലാണ് ലാസിയോയിൽ ചേർന്നത്. 2023ൽ അവരെ സീരി എയിൽ രണ്ടാം സ്ഥാനത്തേക്ക് നയിച്ചു. പിന്നീട് 2024 മാർച്ചിൽ അദ്ദേഹം രാജിവെച്ചു. അതിനുശേഷം ലാസിയോ സ്ഥിരതയ്ക്കായി പോരാടുകയായിരുന്നു. ഒരു സീസണിൽ മൂന്ന് പരിശീലകരെ അവർക്ക് മാറ്റേണ്ടിവന്നു – സാരി, ജിയോവാനി മാർട്ടുസിയേല്ലോ, ഇഗോർ ട്യൂഡോർ – അതിനുശേഷമാണ് 2024 സമ്മറിൽ ബറോണി ചുമതലയേറ്റത്.
2024-25 സീരി എ കാമ്പെയ്‌നിൽ ഏഴാം സ്ഥാനത്ത് ഫിനിഷ് ചെയ്‌തെങ്കിലും, അവസാന ദിനം ലെച്ചെയോട് ഹോം മത്സരത്തിൽ തോറ്റതോടെ ബറോണിയുടെ ലാസിയോയ്ക്ക് യൂറോപ്യൻ യോഗ്യത നഷ്ടമായി.
