സീസണിലെ അവസാന മത്സരത്തിൽ കലിരിയെ 2-0 ന് തകർത്തതോടെ നാപ്പോളി ഇറ്റാലിയൻ ചാമ്പ്യന്മാരായി. ഈ വിജയത്തോടെ അവർ മൂന്ന് വർഷത്തിനിടെ രണ്ടാം തവണയും മൊത്തത്തിൽ നാലാം സീരി എ കിരീടവും സ്വന്തമാക്കി. സ്കോട്ട് മക്ടോമിനെയുടെയും റൊമേലു ലുക്കാക്കുവിൻ്റെയും ഗോളുകളാണ് നാപ്പോളിക്ക് വിജയം സമ്മാനിച്ചത്. ഈ വിജയം നേപ്പിൾസിൽ വലിയ ആഘോഷങ്ങൾക്ക് തിരികൊളുത്തി.
കഴിഞ്ഞ സീസണിൽ പത്താം സ്ഥാനത്തേക്ക് പിന്തള്ളപ്പെട്ട നാപ്പോളി ഇത്തവണ കോണ്ടെക്ക് കീഴിൽ ഗംഭീര തിരിച്ചുവരവ് തന്നെ നടത്തി. രണ്ടാം സ്ഥാനക്കാരായ ഇന്റർ മിലാനെ ഒരു പോയിൻ്റിന് പിന്നിലാക്കിയാണ് അവർ കിരീടം ചൂടിയത്. കോമോയെ 2-0 ന് തോൽപ്പിച്ചെങ്കിലും ഇൻ്ററിന് രണ്ടാം സ്ഥാനം കൊണ്ട് തൃപ്തിപ്പെടേണ്ടി വന്നു.
