ജർമ്മൻ ക്ലബ്ബായ ബയർ ലെവർകുസൻ്റെ ഡച്ച് റൈറ്റ് വിംഗ്-ബാക്ക് ജെറെമി ഫ്രിംപോങ് ലിവർപൂളിലേക്ക് ചേക്കേറാൻ ഒരുങ്ങുന്നു. പൂർണ്ണമായ വാക്കാലുള്ള ധാരണയിൽ എത്തിയതായി ഫബ്രിസിയോ റൊമാനോ റിപ്പോർട്ട് ചെയ്യുന്നു. 2030 വരെയാണ് താരം ലിവർപൂളുമായി കരാർ ഒപ്പുവെക്കുക. ഏകദേശം €35-40 ദശലക്ഷം യൂറോയുടെ റിലീസ് ക്ലോസ് ലിവർപൂൾ സജീവമാക്കിയതായാണ് വിവരം.
24-കാരനായ ഈ താരം ട്രെന്റ് അലക്സാണ്ടർ-അർനോൾഡിന് പകരക്കാരനായാണ് ക്ലബിലേക്ക് എത്തുന്നത്. പുതിയ പരിശീലകനായ ആർനെ സ്ലോട്ട് ഫ്രിംപോങ്ങിനെ ടീമിലെത്തിക്കാൻ ഏറെ താല്പര്യം കാണിച്ചിരുന്നു.
അതിവേഗത്തിലുള്ള മുന്നേറ്റങ്ങളും മികച്ച ക്രോസുകളും ഫ്രിംപോങ്ങിൻ്റെ പ്രധാന പ്രത്യേകതകളാണ്. കഴിഞ്ഞ സീസണിൽ ബുണ്ടസ്ലിഗ കിരീടം നേടിയ ലെവർകുസൻ ടീമിലെ പ്രധാന കളിക്കാരനായിരുന്നു ഫ്രിംപോങ്.
