ഡൽഹിയ്ക്കെതിരെ 6 വിക്കറ്റ് വിജയം നേടി ആര്‍സിബി. 163 റൺസ് വിജയ ലക്ഷ്യം തേടിയിറങ്ങിയ ആര്‍സിബി ഒരു ഘട്ടത്തിൽ 26/3 എന്ന നിലയിലായിരുന്നുവെങ്കിലും വിരാട് കോഹ്‍ലി – ക്രുണാൽ പാണ്ഡ്യ കൂട്ടുകെട്ട് 119 റൺസുമായി ആര്‍സിബിയുടെ വിജയം സാധ്യമാക്കുകയായിരുന്നു. 18.3 ഓവറിലായിരുന്നു ആര്‍സിബിയുടെ 6 വിക്കറ്റ് വിജയം.
ജേക്കബ് ബെത്തലിനെയും ദേവ്ദത്ത് പടിക്കലിനെയും ഒരേ ഓവറിൽ പുറത്താക്കി അക്സര്‍ പട്ടേൽ ബെംഗളൂരുവിന് ഇരട്ട പ്രഹരം ഏല്പിക്കുകയായിരുന്നു. ക്യാപ്റ്റന്‍ രജത് പടിദാറിനെയും ആര്‍സിബിയ്ക്ക് നഷ്ടമായപ്പോള്‍ ടീം 26/3 എന്ന നിലയിലായിരുന്നു.
അവിടെ നിന്ന് വിരാട് കോഹ്‍ലിയും ക്രുണാൽ പാണ്ഡ്യയും കരുതലോടെയാണ് ആര്‍സിബിയെ മുന്നോട്ട് നയിച്ചത്. 10 ഓവര്‍ പിന്നിടുമ്പോള്‍ ടീം 64/3 എന്ന നിലയിലായിരുന്നു. ക്രുണാൽ പാണ്ഡ്യ 47 പന്തിൽ നിന്ന് 73 റൺസ് നേടിയപ്പോള്‍ കോഹ്‍ലി 51 റൺസുമായി പുറത്തായി.
കോഹ്‍ലി പുറത്തായ ശേഷം 5 പന്തിൽ 19 റൺസ് നേടി ടിം ഡേവിഡ് ആര്‍സിബിയുടെ വിജയം വേഗത്തിലാക്കി. 4 വിക്കറ്റ് നഷ്ടത്തിൽ 18.3 ഓവറിലാണ് ആര്‍സിബിയുടെ വിജയം.
