ഇന്ത്യൻ കളിക്കാർ വളരണം എന്ന് താൻ ആഗ്രഹിക്കുന്നുണ്ടെങ്കിലും, കേരള ബ്ലാസ്റ്റേഴ്സ് പരിശീലകൻ എന്ന നിലയിൽ തന്റെ പ്രധാന ഉത്തരവാദിത്തം ഏറ്റവും മികച്ച ടീമിനെ കളത്തിലിറക്കുക എന്നതാണ് എന്ന് ഡേവിഡ് കറ്റാല വ്യക്തമാക്കി.
“ഇന്ത്യൻ കളിക്കാർ വളരുകയും പുരോഗമിക്കുകയും ചെയ്യണം എന്നത് സത്യമാണ്. അത് എന്റെ ഉത്തരവാദിത്തമാണോ എന്നതിനെക്കുറിച്ച് ചോദിച്ചാൽ, അല്ല. ഏറ്റവും മികച്ച പ്രകടനം കാഴ്ചവെക്കാൻ കഴിയും എന്ന് എനിക്ക് തോന്നുന്ന ഏറ്റവും മികച്ച 11 കളിക്കാരെ ഞാൻ ഉപയോഗിക്കും. അവർക്ക് 17 വയസ്സോ 36 വയസ്സോ എന്നത് എനിക്ക് പ്രശ്നമല്ല,” അദ്ദേഹം പറഞ്ഞു.
യുവ കളിക്കാർക്ക് അവസരം നൽകാൻ താൻ എപ്പോഴും തയ്യാറാണെന്നും, എന്നാൽ അവർ അതിനുള്ള യോഗ്യത തെളിയിക്കണം എന്നും അദ്ദേഹം കൂട്ടിച്ചേർത്തു. “യുവ കളിക്കാർക്കൊപ്പം പ്രവർത്തിക്കാനും അവരെ വളർത്താനും എനിക്കിഷ്ടമാണ്. അവർക്ക് കളിക്കാൻ കഴിയും എന്ന് അവർ എന്നെ കാണിച്ചാൽ, അവർക്ക് അവസരം നൽകുന്നതിൽ ഞാൻ മുന്നിലുണ്ടാകും.” അദ്ദേഹം പറഞ്ഞു.
