ഓൾഡ് ട്രാഫോർഡ്: യൂറോപ്പ ലീഗ് ക്വാർട്ടർ ഫൈനലിൽ ലിയോണിനെതിരെ നാടകീയമായ തിരിച്ചുവരവ് നടത്തി മാഞ്ചസ്റ്റർ യുണൈറ്റഡ് സെമിഫൈനലിൽ പ്രവേശിച്ചു. 114-ാം മിനിറ്റ് വരെ 2-4ന് പിന്നിലായിരുന്ന യുണൈറ്റഡ് അവസാന നിമിഷങ്ങളിൽ മൂന്ന് ഗോളുകൾ നേടി അവിശ്വസനീയ വിജയം സ്വന്തമാക്കി.
ഈ സീസണിൽ ഉടനീളം നിരാശയാർന്ന പ്രകടനങ്ങൾ കാഴ്ചവെച്ച യുണൈറ്റഡിന് ഈ വിജയം ഒരു പിടിവള്ളിയായി കണക്കാക്കാം.
മത്സരത്തിൽ ആദ്യം 2-0ന്റെ ലീഡ് കളഞ്ഞ യുണൈറ്റഡ് പിന്നീട് ലിയോൺ 2-2ന് സമനില നേടിയ ശേഷം അവരുടെ താരം ടോളിസോ ചുവപ്പ് കാർഡ് വാങ്ങി പുറത്തായപ്പോൾ ആശ്വസിച്ചു. പക്ഷെ, പത്ത് പേരുമായി കളിച്ച ലിയോൺ രണ്ട് ഗോളുകൾ കൂടി നേടി 4-2ന് മുന്നിലെത്തി. സ്വന്തം തട്ടകത്തിൽ യുണൈറ്റഡ് തോൽവി ഉറപ്പിച്ചതുപോലെ തോന്നിച്ച നിമിഷങ്ങൾ.
എന്നാൽ 114-ാം മിനിറ്റിൽ ബ്രൂണോ ഫെർണാണ്ടസ് പെനാൽറ്റി സ്കോർ ചെയ്ത് യുണൈറ്റഡിന് ഒരു പ്രതീക്ഷ നൽകി. സ്കോർ 3-4 ആയി. പിന്നീട്, കോബി മൈനു 120-ാം മിനിറ്റിൽ ഒരു ഗോൾ നേടി സമനില കൈവരിച്ചു. അഗ്രിഗേറ്റ് സ്കോർ 6-6.
ഇഞ്ചുറി ടൈമിന്റെ ആദ്യ മിനിറ്റിൽ, മുൻ ക്യാപ്റ്റൻ ഹാരി മഗ്വയർ ഒരു ഹെഡ്ഡറിലൂടെ വിജയ ഗോൾ നേടി. ഓൾഡ് ട്രാഫോർഡ് ആവേശത്തിൽ മുങ്ങിപ്പോയ നിമിഷം. സ്കോർ 5-4, അഗ്രിഗേറ്റ് 7-6. അസാധ്യമായത് യുണൈറ്റഡ് യാഥാർത്ഥ്യമാക്കിയ നിമിഷം.
ഈ വിജയം, ചാമ്പ്യൻസ് ലീഗ് യോഗ്യത ലക്ഷ്യമിടുന്ന യുണൈറ്റഡിന് ഒരു പുത്തൻ ഉണർവ് നൽകും. യൂറോപ്പ ലീഗ് കിരീടം അവർക്ക് ഇപ്പോൾ ഒരു ലക്ഷ്യത്തേക്കാൾ ഉപരി ഒരു അനിവാര്യതയാണ്. മാഞ്ചസ്റ്റർ യുണൈറ്റഡിന്റെ ചരിത്രത്തിൽ നിരവധി മികച്ച തിരിച്ചുവരവുകൾ ഉണ്ടായിട്ടുണ്ടെങ്കിലും അവയ്ക്കൊപ്പമോ മുകളിലോ നിക്കുന്ന രാത്രിയാകും ഈ രാത്രി.
