ഇന്ത്യൻ പ്രീമിയർ ലീഗിൽ ചെന്നൈ സൂപ്പർ കിംഗ്സിന് വീണ്ടും പരാജയം. ഇന്ന് ചെന്നൈയിൽ വച്ച് ഡൽഹി ക്യാപിറ്റൽസിനെ നേരിട്ട ചെന്നൈ സൂപ്പർ കിംഗ്സ് 26 റൺസിന്റെ പരാജയമാണ് ഏറ്റുവാങ്ങിയത്. ഡൽഹി ഉയർത്തിയ 184 എന്ന വിജയലക്ഷ്യം പിന്തുടർന്ന ചെന്നൈ സൂപ്പർ കിങ്സിന് 158-5 റൺസ് എടുക്കാൻ മാത്രമേ ആയുള്ളൂ.
മുൻനിര ബാറ്റർമാർ എല്ലാവരും പരാജയപ്പെട്ടത് ചെന്നൈ സൂപ്പർ കിങ്സിന് തിരിച്ചടിയായി. 3 റൺസ് എടുത്ത രചിൻ രവീന്ദ്ര, പതിമൂന്ന് റൺസ് എടുത്ത കോണ്വേ, 5 റൺസ് മാത്രം എടുത്ത ക്യാപ്റ്റൻ റുതുരാജ്. 18 എടുത്ത ശിവം ദൂബെ, 2 റൺസെടുത്ത ജഡേജ എന്നിവർ നിരാശപ്പെടുത്തി.
വിജയ് ശങ്കർ മാത്രമാണ് കുറച്ചെങ്കിലും ചെന്നൈ സൂപ്പർ കിംഗ്സിനായി കളിച്ചത്. എന്നാൽ വിജയ് ശങ്കറിനും റൺ റേറ്റ് ഉയർത്താൻ പറ്റിയില്ല. ധോണി ഏഴാമനായി ഇറങ്ങി പൊരുതാൻ നോക്കിയെങ്കിലും ധോണിയുടെ ശ്രമങ്ങളും എവിടെയും എത്തിയില്ല. പതിനൊന്നാം ഓവറിൽ ധോണി ഇന്ന് കളത്തിൽ എത്തിയുരുന്നു. പക്ഷെ ബൗണ്ടറി കണ്ടെത്താൻ പ്രയാസപ്പെട്ടു. ധോണി 26 പന്തിൽ 39 റൺസും വിജയ് ശങ്കർ 54 പന്തിൽ 69 റൺസും എടുത്തു.
സീസണിൽ 3 മത്സരങ്ങളിൽ മൂന്നും വിജയിച്ച ഡൽഹി ക്യാപിറ്റൽസ് ആറ് പോയിന്റുമായി പോയിൻറ് ടേബിളിൽ ഒന്നാമത് നിൽക്കുകയാണ്
ഇന്ന് ആദ്യം ബാറ്റ് ചെയ്ത ഡൽഹി 20 ഓവറിൽ 183/6 എന്ന മികച്ച സ്കോർ ആണ് ഉയർത്തിയത്. ചെന്നൈയിൽ നടക്കുന്ന മത്സരത്തിൽ കെ എൽ രാഹുലിന്റെ മികച്ച പ്രകടനമാണ് ഡൽഹി ക്യാപിറ്റൽസിന് കരുത്തായത്. ഇന്ന് പതിവു മാറി ഓപ്പണറായി എത്തിയ രാഹുൽ ഗംഭീര പ്രകടനമാണ് കാഴ്ചവച്ചത്.
രാഹുൽ 51 പന്തൽ 77 റൺസ് എടുത്താണ് പുറത്തായത്. അദ്ദേഹം 3 സിക്സും 6 ഫോറും അടിച്ചു. ഇന്ന് തുടക്കത്തിൽ തന്നെ ഡൽഹി ക്യാപിറ്റൽസിന് ഓപ്പണർ ജേക്ക് ഫ്രേസർ മക്ഗർകിനെ നഷ്ടപ്പെട്ടിരുന്നു. 5 പന്തൽ ഒരു റണ്ണ് പോലും എടുക്കാതെയാണ് താരം ഔട്ടായത്. പിന്നാലെ വന്ന അഭിഷേക് പോറൽ 20 പന്തൽ 33 റൺസും ക്യാപ്റ്റൻ അക്സർ പട്ടേൽ 14 പന്തിൽ 21 റൺസും എടുത്തു.
റിസ്വി 15 പന്തിൽ 20 എടുത്തും പുറത്തായി. പക്ഷെ രാഹുൽ ഒരു വശത്ത് ശക്തമായി തുടർന്നു. അവസാനം സ്റ്റബ്സിനൊപ്പം ചേർന്ന് സ്കോർ ഉയർത്താൻ നോക്കി എങ്കിലും ഡൽഹിക്ക് 200 എന്ന സ്കോറിലേക്ക് എത്താൻ ആയില്ല. സ്റ്റബ്സ് 12 പന്തിൽ 24 റൺസ് ആണ് എടുത്തത്.
