സ്റ്റേഡിയത്തിന് പുറത്ത് നടക്കേണ്ടിയിരുന്ന ആരാധക പ്രതിഷേധങ്ങളെ തടയാൻ പോലീസിനെ ഇടപെടുത്താൻ ക്ലബ് നിർദ്ദേശം നൽകിയെന്ന ആരോപണങ്ങളെ നിഷേധിച്ച് കേരള ബ്ലാസ്റ്റേഴ്സ് എഫ്‌സി ഔദ്യോഗിക പ്രസ്താവന പുറത്തിറക്കി.
പൊതു പരിപാടികളിൽ ക്രമസമാധാനം നിലനിർത്തേണ്ടത് സ്വതന്ത്ര സർക്കാർ അധികാരികളുടെ മാത്രം ഉത്തരവാദിത്തമാണെന്ന് ഊന്നിപ്പറഞ്ഞുകൊണ്ട്, സംസ്ഥാന പോലീസിന്റെ നടപടികളിൽ യാതൊരു സ്വാധീനവും ക്ലബ് ചെലുത്തിയില്ല എന്ന് ക്ലബ് വ്യക്തമാക്കി.
“പോലീസ് ഇടപെടൽ ക്ലബ്ബിന്റെ നിർദ്ദേശപ്രകാരമല്ല, കാരണം ഞങ്ങൾ ക്രമസമാധാന സംവിധാനത്തിന്റെ ഭാഗമല്ല,” പ്രസ്താവനയിൽ വ്യക്തമാക്കി.
ആരാധകർക്ക് സമാധാനപരമായി അഭിപ്രായങ്ങൾ പ്രകടിപ്പിക്കാനുള്ള അവകാശത്തെ കേരള ബ്ലാസ്റ്റേഴ്സ് പിന്തുണച്ചു, എന്നാൽ പൊതു ഇടങ്ങളിൽ സുരക്ഷ ഉറപ്പാക്കേണ്ടതിന്റെ പ്രാധാന്യം ക്ലബ് ഊന്നിപ്പറഞ്ഞു. പോലീസ് നടപടിക്ക് നിർദ്ദേശം നൽകിയെന്ന പ്രചരിക്കുന്ന അവകാശവാദങ്ങളും “തെറ്റായതും തെറ്റിദ്ധരിപ്പിക്കുന്നതും അടിസ്ഥാനരഹിതവുമാണ്” എന്ന് ക്ലബ്ബ് തള്ളിക്കളഞ്ഞു.
ഈ ആരോപണങ്ങൾ അന്വേഷിക്കുമെന്നും തെറ്റായ വിവരണങ്ങൾ പ്രചരിപ്പിക്കുന്നവർക്കെതിരെ ഉചിതമായ നടപടികൾ സ്വീകരിക്കുമെന്നും ക്ലബ് ആരാധകർക്ക് ഉറപ്പ് നൽകി.
“എല്ലാവർക്കും സുരക്ഷിതമായ അന്തരീക്ഷം ഉറപ്പാക്കുന്നതിനൊപ്പം, ഞങ്ങളുടെ പിന്തുണക്കാരിൽ നിന്ന് ഏത് രൂപത്തിലുള്ള അഭിപ്രായങ്ങളും സ്വീകരിക്കാൻ ഞങ്ങൾ തയ്യാറാണ്.” ക്ലബ് പ്രസ്താവനയിൽ പറഞ്ഞു.
സമാധാനപരമായ ആരാധക പ്രതിഷേധങ്ങളെ പോലീസ് നടപടി തടസ്സപ്പെടുത്തിയെന്ന റിപ്പോർട്ടുകളെ തുടർന്നാണ് പ്രസ്താവന. ഇത് വ്യാപകമായ വിമർശനത്തിന് ഇടയാക്കിയിരുന്നു.
