ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ യുണൈറ്റഡിന് തകർപ്പൻ വിജയം. ഇന്ന് ഓൾഡ്ട്രാഫോർഡിൽ വെച്ച് എവർട്ടണെ നേരിട്ട മാഞ്ചസ്റ്റർ യുണൈറ്റഡ് എതിരില്ലാത്ത 4 ഗോളുകൾക്ക് ആണ് വിജയിച്ചത്. അമോറിമിനു കീഴിലെ മാഞ്ചസ്റ്റർ യുണൈറ്റഡിന്റെ പ്രീമിയർ ലീഗിലെ ആദ്യ വിജയമാണിത്.
ഇന്ന് യൂറോപ്പ മത്സരത്തിൽ നിന്ന് ആറോളം മാറ്റങ്ങൾ വരുത്തിയാണ് അമോറിം ടീമിനെ ഇറക്കിയത്. തുടക്കത്തിൽ യുണൈറ്റഡ് താളം കണ്ടെത്താൻ പ്രയാസപ്പെട്ടു എങ്കിലും 34ആം മിനുട്ടിൽ ഒരു കോർണറിലൂടെ മാഞ്ചസ്റ്റർ യുണൈറ്റഡ് ഗോൾ നേടി. ബ്രൂണോ എടുത്ത കോർണർ റാഷ്ഫോർഡ് ഒരു വൺ ടച്ച് സ്ട്രൈക്കിലൂടെ ലക്ഷ്യത്തിൽ എത്തിച്ചു. സ്കോർ 1-0.
ഈ ഗോളിനു ശേഷം മാഞ്ചസ്റ്റർ യുണൈറ്റഡിന്റെ ആത്മവിശ്വാസം ഇരട്ടിയായി. 41ആം മിനുട്ടിൽ യുണൈറ്റഡിന്റെ രണ്ടാം ഗോൾ വന്നു. ഇത്തവണ സിർക്സിയുടെ സ്ട്രൈക്ക്. അമദ് എവർട്ടൺ ഡിഫൻസിൽ നിന്ന് വിൻ ചെയ്ത പന്ത് ബ്രൂണോയിലേക്ക്. ബ്രൂണോ ബോക്സിലേക്ക് കുതിച്ചെത്തിയ സിർക്സിക്ക് പാസ് കൈമാറി. പന്ത് സിർക്സി വലയിലേക്ക് തൊടുത്തു. സ്കോർ 2-0.
രണ്ടാം പകുതി ആരംഭിച്ച് 30 സെക്കൻഡുകൾക്ക് അകം മാഞ്ചസ്റ്റർ യുണൈറ്റഡ് അവരുടെ മൂന്നാം ഗോൾ കണ്ടെത്തി. ഇത്തവണ അമദ് സൃഷ്ടിച്ച അവസരം റാഷ്ഫോർഡ് ലക്ഷ്യത്തിൽ എത്തിച്ചു. സ്കോർ 3-0. മാഞ്ചസ്റ്റർ യുണൈറ്റഡ് ഇതിനു ശേഷം മാറ്റങ്ങൾ നടത്തി എങ്കിലും അവരുടെ അറ്റാക്കിനു കുറവു വന്നില്ല.
64ആം മിനുട്ടിൽ സിർക്സിയിലൂടെ മാഞ്ചസ്റ്റർ യുണൈറ്റഡ് തങ്ങളുടെ നാലാം ഗോൾ കണ്ടെത്തി. ഒരിക്കൽ കൂടെ അമദ് ആയിരുന്നു ഗോൾ സൃഷ്ടിച്ചത്.
ഈ വിജയത്തോടെ മാഞ്ചസ്റ്റർ യുണൈറ്റഡ് യുണൈറ്റഡ് പ്രീമിയർ ലീഗിൽ ഒമ്പതാം സ്ഥാനത്ത് എത്തി. 13 മത്സരങ്ങളിൽ നിന്ന് 19 പോയിന്റാണ് യുണൈറ്റഡിനുള്ളത്. എവർട്ടൺ 11 പോയിന്റുമായി 15ആം സ്ഥാനത്ത് നിൽക്കുന്നു.
