ഇന്നലെ യൂറോ കപ്പ് ക്വാർട്ടർ ഫൈനലിൽ 119 മത്തെ മിനിറ്റിൽ മിഖേൽ മൊറേനോയുടെ അതുഗ്രൻ ഹെഡർ വിജയഗോളിൽ സ്‌പെയിൻ ജർമ്മനിയെ തോൽപ്പിക്കുമ്പോൾ താരത്തിന്റെ ഗോൾ ആഘോഷവും ശ്രദ്ധേയമാവുകയാണ്. കോർണർ ഫ്ലാഗിനു ചുറ്റും വട്ടം വെച്ചാണ് മൊറേനോ തന്റെ ഗോൾ ആഘോഷിച്ചത്. സ്പെയിനിന് ആയി തന്റെ അഞ്ചാം മത്സരത്തിൽ തന്റെ ആദ്യ ഗോൾ ആണ് റയൽ സോസിദാഡ് താരം നേടിയത്. താരത്തിന്റെ ഗോൾ ആഘോഷം ആണ് നിലവിൽ വൈറൽ ആയത്.
33 വർഷങ്ങൾക്ക് മുമ്പ് 1991 നവംബറിൽ തന്റെ അച്ഛൻ ആഞ്ചൽ മൊറേനോ സ്റ്റുഗാർട്ടിൽ ഇതേ മൈതാനത്ത് ചെയ്ത ഗോൾ ആഘോഷം ആണ് മിഖേൽ മൊറേനോ ആവർത്തിച്ചത്. അന്ന് ഒസാസുന താരം ആയിരുന്ന ആഞ്ചൽ മൊറേനോ യുഫേഫ കപ്പ് രണ്ടാം ലെഗ് മത്സരത്തിൽ സ്റ്റുഗാർട്ടിനു എതിരെ ഗോൾ നേടിയ ശേഷമാണ് ഇതേ ആഘോഷം നടത്തിയത്. 33 വർഷങ്ങൾക്ക് ശേഷം തന്റെ കരിയറിലെ ഏറ്റവും തിളങ്ങുന്ന നിമിഷത്തിൽ അച്ഛന്റെ ഗോൾ ആഘോഷം ആവർത്തിച്ചു അച്ഛന് നൽകാവുന്ന ഏറ്റവും മികച്ച ട്രിബ്യൂട്ട് തന്നെ മിഖേൽ മൊറേനോ സമ്മാനിച്ചത് മനോഹരമായ കാഴ്ചയായി.
