അന്താരാഷ്ട്ര സൗഹൃദ മത്സരത്തിൽ പോർച്ചുഗലിന് മികച്ച വിജയം. അവർ സ്വീഡനെ രണ്ടിനെതിരെ അഞ്ചു ഗോളുകൾക്ക് ആണ് പരാജയപ്പെടുത്തിയത്. ക്രിസ്റ്റ്യാനോ റൊണാൾഡോ പോർച്ചുഗലിനൊപ്പം ഇന്നലെ ഉണ്ടായിരുന്നില്ല. റൊണാൾഡോയുടെ അഭാവം അറിയിക്കാത്ത പ്രകടനമാണ് പോർച്ചുഗീസ് പട നടത്തിയത്.
ആദ്യ പകുതിയിൽ തന്നെ മൂന്ന് ഗോളുകൾക്ക് മുന്നിൽ എത്താൻ അവർക്ക് ആയി. 24ആം മിനുട്ടിൽ റാഫേൽ ലിയോയിലൂടെ ആയിരുന്നു പോർച്ചുഗൽ ഗോളടി തുടങ്ങിയത്. 33ആം മിനുട്ടിൽ നൂനസ് ലീഡ് ഇരട്ടിയാക്കി. ആദ്യ പകുതി അവസാനിക്കും മുമ്പ് ബ്രൂണോ ഫെർണാണ്ടസ് കൂടെ ഗോൾ നേടിയതോടെ 3-0 എന്ന നിലയിൽ ആദ്യ പകുതി അവസാനിപ്പിച്ചു.
രണ്ടാം പകുതിയിൽ 57ആം മിനുട്ടിൽ ബ്രുമയും 61ആം മിനുട്ടിൽ ഗോൺസാലോ റാമോസും കൂടെ ഗോൾ നേടിയതോടെ പോർച്ചുഗൽ വിജയം ഉറപ്പിച്ചു. ഗ്യോകെർസും നിൽസണുമാണ് സ്വീഡന്റെ ഗോളുകൾ നേടിയത്. പോർച്ചുഗൽ ഇനി അടുത്ത മത്സരത്തിൽ മാർച്ച് 26ന് സ്ലൊവീന്യയെ നേരിടും.
