ഏഷ്യന്‍ ഗെയിംസ് ടി20 ക്രിക്കറ്റിന്റെ പുരുഷ സെമിയിൽ കടന്ന് അഫ്ഗാനിസ്ഥാന്. ശ്രീലങ്കയ്ക്കെതിരെ 8 റൺസ് വിജയം ആണ് ടീം നേടിയത്.. ഇന്ന് നടന്ന മത്സരത്തിൽ ആദ്യം ബാറ്റ് ചെയ്ത അഫ്ഗാനിസ്ഥാന് 116 റൺസ് മാത്രം നേടിയുള്ളുവെങ്കിലും ശ്രീലങ്കയെ പ്രതിരോധത്തിലാഴ്ത്തി അവരുടെ 9 വിക്കറ്റുകള്‍ വീഴ്ത്തുവാന്‍ അഫ്ഗാനിസ്ഥാന് സാധിച്ചു.
അവസാന ഓവറിൽ 9 റൺസായിരുന്നു ഒരു വിക്കറ്റ് അവശേഷിക്കുമ്പോള്‍ ശ്രീലങ്ക നേടേണ്ടിയിരുന്നത്. നുവാന്‍ തുഷാരയെ പുറത്താക്കി കരീം ജനത് അവസാന വിക്കറ്റ് നേടിയപ്പോള്‍ ശ്രീലങ്കയ്ക്ക് 108 റൺസ് മാത്രമേ 19.1 ഓവറിൽ നേടാനായുള്ളു. അഫ്ഗാനിസ്ഥാനായി ഗുൽബാദിന്‍ നൈബ് 3 വിക്കറ്റ് നേടി. 22 റൺസ് നേടിയ സഹന്‍ അരാചിഗേയാണ് ശ്രീലങ്കയുടെ ടോപ് സ്കോറര്‍.
51 റൺസ് നേടിയ നൂര്‍ അലി സദ്രാന്‍ ആയിരുന്നു അഫ്ഗാനിസ്ഥാന്റെ ബാറ്റിംഗിൽ തിളങ്ങിയത്. ഷാഹിദുള്ള 14 പന്തിൽ 23 റൺസ് നേടി. ശ്രീലങ്കയ്ക്കായി നുവാന്‍ തുഷാര 4 വിക്കറ്റ് നേടി.
