മാഞ്ചസ്റ്റർ യുണൈറ്റഡ് സെന്റർ ഹാരി മഗ്വയറിനെ സ്വന്തമാക്കാനായി പ്രീമിയർ ലീഗ് ക്ലബായ വെസ്റ്റ് ഹാം രംഗത്ത്. മാഞ്ചസ്റ്റർ യുണൈറ്റഡുമായി വെസ്റ്റ് ഹാം ചർച്ചകൾ ആരംഭിച്ചതായി സ്കൈ സ്പോർട്സ് റിപ്പോർട്ട് ചെയ്യുന്നു. മാഞ്ചസ്റ്റർ യുണൈറ്റഡ് താരത്തിന് 50 മില്യൺ യൂറോ വിലയിട്ടതായാണ് റിപ്പോർട്ടുകൾ. എന്നാൽ 35 മില്യൺ നൽകി താരത്തെ സ്വന്തമാക്കാൻ ആകും എന്ന് വെസ്റ്റ് ഹാം വിശ്വസിക്കുന്നു. അതിനായില്ല എങ്കിൽ അവർ ലോണിൽ മഗ്വയറിനെ ടീമിൽ എത്തിക്കാനും ശ്രമിക്കും.
കഴിഞ്ഞ ദിവസം മഗ്വയറിനെ ക്യാപ്റ്റൻ സ്ഥാനത്ത് നിന്ന് മാഞ്ചസ്റ്റർ യുണൈറ്റഡ് നീക്കിയിരുന്നു. ഇത് താരം എന്തായാലും ക്ലബ് വിടും എന്നതിന്റെ സൂചനയാണ്. ചെൽസിയും മഗ്വയറിനെ ടീമിലെത്തിക്കാൻ ശ്രമം നടത്തുന്നതായി റിപ്പോർട്ടുകൾ ഉണ്ട്.
മഗ്വയറും മാഞ്ചസ്റ്റർ യുണൈറ്റഡ് വിടാൻ ആണ് ആഗ്രഹിക്കുന്നത്. കഴിഞ്ഞ സീസണിൽ അപൂർവ്വ മത്സര‌ങ്ങളിൽ മാത്രമാണ് മഗ്വയർ യുണൈറ്റഡ് ആദ്യ ഇലവനിൽ ഉണ്ടായിരുന്നത്. ഇറങ്ങിയപ്പോൾ ആകട്ടെ അത്ര തൃപ്തികരമായ പ്രകടനമല്ല മഗ്വയറിൽ നിന്ന് ഉണ്ടായത്. ലിസാൻഡ്രോ മാർട്ടിനസ്, വരാനെ, ലിൻഡെലോഫ് എന്തിന് ലൂക് ഷോയ്ക്കും പിറകിൽ മാത്രമാണ് മഗ്വയറിന് സെന്റർ ബാക്ക് പൊസിഷനിൽ ഉള്ള സ്ഥാനം.
2019ൽ ലെസ്റ്റർ സിറ്റിയിൽ നിന്ന് ഒരു റെക്കോർഡ് തുകക്ക് ആണ് മഗ്വയർ മാഞ്ചസ്റ്റർ യുണൈറ്റഡിൽ എത്തിയത്. അന്ന് മുതൽ വലിയ വിമർശനങ്ങൾ താരം നേരിടുന്നുണ്ട്.
