റോയൽ ചലഞ്ചേഴ്‌സ് ബാംഗ്ലൂർ (ആർ സി ബി) 2022ലെ ഐ‌പി‌എൽ മെഗാ ലേലത്തിന് മുമ്പ് തന്നെ നിലനിർത്താൻ ശ്രമിക്കാത്തതിലെ നിരാശ തുറന്നു പറഞ്ഞ് യുസ്വേന്ദ്ര ചാഹൽ. ആ സമയത്ത് തനിക്ക് വളരെ സങ്കടം തോന്നി എന്ന് ചാഹൽ പറഞ്ഞു. എന്റെ യാത്ര ആരംഭിച്ചത് ആർസിബിയിൽ നിന്നാണ്. എട്ടു വർഷം ഞാൻ അവരോടൊപ്പം ചെലവഴിച്ചു. ആർസിബി എനിക്ക് ഒരു അവസരം നൽകി, അവർ കാരണം എനിക്ക് ഒരു ഇന്ത്യൻ ക്യാപ്പ് ലഭിച്ചു. യുട്യൂബർ രൺവീർ അലാബാദിയയുടെ പോഡ്‌കാസ്റ്റിൽ ചാഹൽ പറഞ്ഞു.
“ആദ്യ മത്സരം മുതൽ വിരാട് എന്നിൽ വിശ്വാസം പ്രകടിപ്പിച്ചു. അതിനാൽ, ക്ലബ് വിടേണ്ടി വന്നപ്പോൾ അത് മോശമായി തോന്നി, കാരണം നിങ്ങൾ ഒരു ടീമിൽ 8 വർഷം ചെലവഴിക്കുമ്പോൾ അത് കുടുംബം പോലെയാകും.” ചാഹൽ പറഞ്ഞു.
“ഞാൻ വലിയ തുക ആവശ്യപ്പെട്ടു എന്നൊക്കെ അന്ന് വാർത്തകൾ വന്നു. അങ്ങനെയൊന്നും ഇല്ലെന്ന് ഞാൻ അന്ന് തന്നെ വ്യക്തമാക്കി. ഞാൻ അർഹിക്കുന്നതെന്താണെന്ന് എനിക്കറിയാം” അദ്ദേഹം പറഞ്ഞു
“എനിക്ക് ശരിക്കും വിഷമം തോന്നിയത് ഒരു ഫോൺ കോളോ ആശയവിനിമയമോ ആർ സി ബിയുടെ ഭാഗത്ത് നിന്ന് ഇല്ലായിരുന്നു എന്നതാണ്. ഞാൻ അവർക്കായി 114 മത്സരങ്ങൾ കളിച്ചിട്ടുണ്ട്. ലേലത്തിൽ, അവർ എനിക്കുവേണ്ടി എല്ലാം ചെയ്യുമെന്ന് വാഗ്ദാനം ചെയ്തുരുന്നു.” ചാഹൽ പറയുന്നു.
“എന്നെ അവർ തിരഞ്ഞെടുക്കാതിരുന്നപ്പോൾ ഞാൻ വളരെ ദേഷ്യപ്പെട്ടു. ഞാൻ അവർക്ക് 8 വർഷം നൽകി. ചിന്നസ്വാമി എന്റെ പ്രിയപ്പെട്ട മൈതാനമായിരുന്നു. ഞാൻ ആർസിബി പരിശീലകരുമായി സംസാരിച്ചിട്ടില്ല. ഞാൻ അവർക്കെതിരെ കളിച്ച ആദ്യ മത്സരത്തിൽ ഞാൻ ആരോടും സംസാരിച്ചിട്ടില്ല” അദ്ദേഹം കൂട്ടിച്ചേർത്തു
