ബേൺലി ഫുട്ബോൾ ക്ലബ് അവരുടെ മാനേജർ വിൻസെന്റ് കൊമ്പനിക്ക് പുതിയ കരാർ നൽകി. ടർഫ് മൂറിലെ തന്റെ ആദ്യ സീസണിൽ ചാമ്പ്യൻഷിപ്പ് വിജയിച്ച് പ്രീമിയർ ലീഗിലേക്ക് പ്രൊമോഷൻ ഉറപ്പിച്ച കൊമ്പനി അഞ്ച് വർഷത്തെ പുതിയ കരാറിൽ ഒപ്പുവച്ചു.
കുറഞ്ഞത് 2028 വരെ കൊമ്പനി ബേർൺലിയിൽ ഉണ്ടാകും “ബേൺലിയിലെ ജോലി തുടക്കം മുതൽ തന്നെ നല്ലതായിരുന്നു. അടുത്ത അഞ്ച് വർഷത്തേക്ക് കരാർ ഒപ്പിടുന്നത് ശരിയായ കാര്യമാണെന്ന് തോന്നുന്നു.” കൊമ്പനി പറഞ്ഞു.
“ആരാധകർക്കൊപ്പം ഞങ്ങൾ ടർഫ് മൂറിനെ വീണ്ടും ഒരു കോട്ടയാക്കി മാറ്റി, ഭാവിയിലെ ഓരോ ചുവടിലും ബേൺലിയെ മികച്ചതാക്കാൻ കാത്തിരിക്കുന്നു.” അദ്ദേഹം പറഞ്ഞു.
കൊമ്പനി ഒരു അസാധാരണ നേതാവ് ആണ് എന്നും ഉയർന്ന നിലവാരം സ്ഥാപിക്കുന്നുണ്ട് എന്നും ചെയർമാൻ അലൻ പേസ് പറഞ്ഞു. ചാമ്പ്യന്മാരായ ബേൺലിയുടെ തിങ്കളാഴ്‌ച ട്രോഫി ഏറ്റുവാങ്ങും. അതിനു മുമ്പായാണ് ഈ കരാർ പ്രഖ്യാപനം. കൊമ്പനിയെ പരിശീലകനായി എത്തിക്കാൻ നേരത്തെ ചെൽസി ചർച്ചകൾ നടത്തിയിരുന്നു.
