അലക്സിസ് മാക് അലിസ്റ്ററിന് മുൻപിൽ ഓഫർ സമർപ്പിച്ച് ലിവർപൂൾ. തങ്ങളുടെ ഭാവി പരിപാടികൾ അടങ്ങിയ പ്രോജക്റ്റും താരത്തിനുള്ള വ്യക്തിപരമായ ഓഫറുമാണ് ലിവപൂൾ ഇപ്പോൾ നൽകിയിരിക്കുന്നത്. ഇതോടെ ക്ലോപ്പിന്റെ മധ്യനിരയെ ഭരിക്കാൻ അർജന്റീനൻ താരത്തെ തന്നെ എത്തിക്കാൻ ആണ് ലിവർപൂൾ നീക്കമെന്ന് ഉറപ്പായി. താരം ബ്രൈറ്റൺ വിടുമെന്ന് ഉറപ്പായതായി ഫാബ്രിസിയോ റോമാനോ റിപ്പോർട്ട് ചെയ്തു. ഓഫർ സമ്മർപ്പിച്ചെങ്കിലും തുടർന്നുള്ള ചർച്ചകൾ വരും വാരങ്ങളിലെ നടക്കുകയുള്ളൂ. ബെല്ലിങ്ഹാമിന്റെ റയലിലേക്കുള്ള കൈമാറ്റം ഉറപ്പായ ശേഷമാണ് മാക് അലിസ്റ്ററിന് വേണ്ടിയുള്ള ലിവർപൂൾ ഓഫർ വന്നത് എന്നതും ശ്രദ്ധേയമാണ്.
നേരത്തെ തന്നെ ഇരുപത്തിനാലുകാരനു വേണ്ടി പ്രമുഖ ക്ലബ്ബുകൾ രംഗത്തുണ്ടായിരുന്നു. ലോക ജേതാക്കളായാ അർജന്റീനക്ക് വേണ്ടി തകർപ്പൻ പ്രകടനം പുറത്തെടുത്ത താരത്തെ എത്തിക്കാൻ യുവന്റസിന് അടക്കം താല്പര്യം ഉണ്ടായിരുന്നു. എന്നാൽ പ്രീമിയർ ലീഗിൽ തന്നെ താരം തുടരും എന്നാണ് ഇപ്പോൾ ലഭിക്കുന്ന സൂചനകൾ. 2025 വരെയുള്ള കരാർ ആണ് താരത്തിന് ബ്രൈറ്റണിൽ ബാക്കിയുള്ളത്. മികച്ച മധ്യനിരയുടെ അഭാവം മൂലം സീസണിൽ വളരെ ബുദ്ധിമുട്ടിയ ലിവർപൂൾ പുതിയ താരങ്ങളെ എത്തിക്കാനുള്ള നീക്കത്തിലും ആണ്. ബ്രൈറ്റൺ വിടാൻ ഉറച്ച അലിസ്റ്റർ ലിവർപൂളിന്റെ ഓഫർ തീർച്ചയായും പരിഗണിക്കും. മധ്യനിര താരത്തെ എത്തിക്കുന്നതിന് പുറമെ മറ്റ് ഒരു പിടി താരങ്ങൾക്ക് പുറത്തെക്കുള്ള വഴിയും ലിവർപൂൾ തുറക്കും. ഏകദേശം 70 മില്യൺ പൗണ്ടോളം താരത്തിന് വേണ്ടി ബ്രൈറ്റൺ അവശ്യപ്പെട്ടേക്കും എന്നാണ് ഇംഗ്ലീഷ് മാധ്യമങ്ങൾ നൽകുന്ന സൂചന.
